La organización ufrió a lo llargo’l día los videos nos sos perfiles d’Instagram, Twitter, y Facebook
Iniciativa pol Asturianu aprovechó la xornada d’ayeri pa facer un llamáu a los escritores n’asturianu y gallego-asturianu pa grabar un videu lleendo dalguna obra poética propia o de terceros y espardiendo los videos al traviés de les redes sociales de la organización a tola sociedá.
A la iniciativa sumáronse decenes d’escritores, como Susana Sela, Berta Piñán, Juan Carlos García Hoyuelos, Xuan Miyar, Alba Carballo, Inaciu Galán, Marta Mori, María Esther García López, Alfredo Garay, Chechu García, Mercedes de Soignie, Crisitina Menéndez, Antón García, Consuelo Vega o Henrique Facuriella, ente otros.
Iniciativa pol Asturianu quixo d’esta manera celebrar con esta llectura dixital el Día Mundial de la Poesía. Amás dende la organización quixeron dar una visibilidá a la lliteratura asturiana y averala a la sociedá nesti momentu complicáu d’andanciu. Tamién foi una manera de dar visibilidá a la bayurosa cantidá de muyeres escritores qu’utilicen la llingua asturiana y el gallego-asturianu, lo que ye un arguyu pa la nuesa sociedá.
Los vídeos pueden vese nes redes sociales d’Iniciativa pol Asturianu como Instagram (@iniciativaxast), Facebook (Iniciativa pol Asturianu) y Twitter (@IniciativaxAst).
