El Conceyu de Cangas del Narcea decidió conceder el premiu del XIX Concursu de Cuentos Curtios del Conceyu de Cangas del Narcea al bualés Miguel Rodríguez Monteavaro, depués de que’l xuráu valorara ‘Melchor de Quirós’ como’l meyor cuentu escritu na variedá occidental del asturianu. El rellatu repasa los díes últimos d’esti personaxe hestóricu usando elementos biográficos reales y de ficción que consiguen averar al llector, d’una manera mui emotiva, al orixe de la persona que precedió a esti eclesiásticu tan característicu, Quirós. El premiu d’esta categoría ta valoráu en 500 €.
El premiu al meyor cuentu escritu n’asturianu normativu, tamién valoráu en 500 €, foi pa la escritora de Castrillón Yose Álvarez-Mesa, que se presentó al concursu cola obra ‘Rabilando nel fríu’, un cuentu en tercer persona con reminiscencies kafkianes y toques de humor negru que consiguió captar l’atención del xuráu.
El xuráu, que s’axuntóu anueche, tuvo compuestu poles filóloges, docentes ya investigadores, María Cueto, Marta López y Laura Rodríguez, amás de pola filóloga responsable del Serviciu de Normalización Ḷḷingüística de Cangas del Narcea, Mónica Rodríguez. El xuráu destacó la bona calidá de los trabayos presentaos, na so mayoría d’ambientación hestórica, y tamién la participación nesta XIX edición del Concursu de Cuentos Curtios del Conceyu de Cangas del Narcea.
