La editorial Pintar-Pintar va abrir el so nuevu espaciu nel corazón d’Uviéu, el sábadu 20 de payares, y va dar abellugu a publicaciones propies y del restu de sellos integraos nel Gremiu d’Editores d’Asturies / Gremio de Editores de Asturias. El llocal, asitiáu na plaza Xuan XXIII, a dos minutos de la catedral y del Muséu de Belles Artes, va cuntar con espaciu enforma p’agospiar presentaciones, cuentacuentos o talleres, amás d’artículos con diseños de diferentes ilustradores.
El llocal nuevu, Pintar-Pintar – Libros, colores y Lletres Asturianes, ñaz cola idea de convertise en puntu d’alcuentru pa los amantes de la cultura —y los llibros en particular—, y va dar cabida a obres espublizaes por editoriales de casa: sellos independientes con catálogos de gran calidá y con autores, en munchos casos, ñacíos n’Asturies y qu’escriben n’asturianu, castellanu o dambes llingües.
Entrugada poles novedaes sobre’l llocal, Ester Sánchez, editora de Pintar-Pintar, respuende mui ilusionada. «Hai una importante y allegre novedá dempués de reuninos colos nuesos colegues del Gremiu d’Editores d’Asturies, y ye que l’espaciu va dar cabida a les editoriales del gremiu», esplica.
Ye fácil imaxinar los llibros de Pintar-Pintar tras les llunes, un sombreru que vuela, un poema cayíu a la mar, una neña qu’echa andar la motosierra o un ratón perraru que papa les pallabres. Tamién nomes d’autores como Daniel García Granda, Berta Piñán, María Rosa Serdio, Vicente García Oliva, José Carlos Román o Carmen Gómez Ojea, lligaos a los d’ilustradores como Antonio Acebal, Blanca BK, Elena Fernández, Mónica Carretero, Ilemi Cuesta Mier o la propia Ester Sánchez.
Tampoco cuesta imaxinar, de cara a Porlier, los llibros de Pez de Plata, Trabe, BaxAmar o Delallama, por citar dalgunos sellos del gremiu, con autores como Leticia Sánchez Ruiz, Ignacio González, Carolina Sarmiento, Xandru Martino Ruz o Xuan Bello. Nin l’actividá d’un fin de selmana, tres los llibros, colos neños y neñes nun taller d’espresión plástica o entamando una visita al muséu.
Pintar-Pintar nació nel 2005 col propósitu d’imaxinar y editar llibros ilustraos, pensaos pa neñes y neños pero tamién pa mayores ainda abiertos a la Lliteratura Infantil y Xuvenil. La editorial, asina mesmo, xestiona actividaes educatives p’aniciar a los más pequeños nel conocimientu y disfrute del arte. El llabor editorial de Pintar-Pintar foi reconocíu, ente otros gallardones, col Premiu Nacional a la Edición de los años 2007, 2012 y 2014. Durante más d’un llustru, y hasta xunetu del 2020, xestionó un espacio cultural semeyante nel Centru Niemeyer, Avilés. El día 20 principia la so nueva etapa n’Uviéu.
