Ediciones Radagast saca “Vikingos: 2035” y “El Xuegu d’Ender” les dos propuestes de ciencia ficción. Un clásicu y una novela bien asturiana.
La primer propuesta trescurre nel añu 2035. Una catástrofe afaró’l mundu y la enfermedá llevó a la inmensa mayoría de la xente per delantre. Tolos asturianos tán muertos… ¿Toos? Non. Una comuna anarquista de los últimos supervivientes álzase sobre les ruines de lo qu’un día foi L.luarca. Esta ye la innovadora propuesta del escritor carbayón Abel Martínez. Una distopía post-apocalíptica na que siguimos los pasos d’Amaro, un superviviente de la catástrofe nel que la enfermedá avanza más lento de lo normal. Sobreviviendo como pue, llega hasta l’Arca los Llobos, una comuna que s’auto-organiza de manera idílica nes ruines de lo qu’un día foi L.luarca hasta que dalgo peligroso vien de la mar.
La otra propuesta d’Ediciones Radagast pa esti iviernu ye El Xuegu d’Ender la traducción al asturianu del clásicu de ciencia ficción d’Orson Scott Card que fai Xesús González Rato, que yá fixere otres traducciones pa la editorial como son Momo o La Hestoria Inacabable de Michael Ende. Nesti clásicu de la ciencia ficción la humanidá enfréntase a una raza alieníxena que quier acabar con ella y Ender ha formase pa dirixir la guerra escontra l’enemigu esterior.
