La Conseyería de Presidencia convocó la 33ª edición del programa de promoción de mozos creadores Culturaquí, con una medría significativa na cuantía de los premios, que van tener una dotación de 35.000 euros.
La convocatoria pretende dar mayor impulsu a les distintes modalidaes que conformen los galardones: artes plástiques, lliteratura, cine o música, amás de fomentar la participación de mozos menores de 35 años y d’espublizar estes manifestaciones culturales tantu n’Asturies como fora de la comunidá.
La participación ta abierta a cualesquier artista que naciera o more n’Asturies y que la so edá nun supere los 35 años a 31 d’avientu d’anguaño. Tamién pueden sumase descendientes, hasta segundu grau, d’emigrantes, lo cual dexó, dende 2008, internacionalizar el programa ensin arrenunciar a les bases d’asturianía nes que se sofita.
Culturaquí 2023 inclúi les siguientes convocatories:
– Amuesa d’Artes Plástiques. A la 33ª edición podrá presentase cualquier tipu de propuesta artística: pintura, escultura, fotografía, dibuxu, grabáu, instalaciones, videoinstalaciones, etcétera. Tantu la tema, como la técnica y los materiales van ser llibres. Un xuráu va escoyer un máximu de seis artistes, cada unu de los cualos va recibir un premiu en metálicu de mil euros. Los ganadores van formar parte d’una esposición colectiva na Sala Borrón d’Uviéu n’ochobre. Amás, va concedese’l Premiu Asturies Nuevu d’Artes Plástiques, dotáu con 6.000 euros y el montaxe d’una esposición individual. Les obres van poder presentase hasta’l 30 de xunu.
– Concursu de maquetes pa grupos pop y rock. El certame realízase en collaboración con Cadena Ser 40 Principales Asturies y ta dirixíu a grupos o solistes de pop y rock. Va escoyese una maqueta ganadora, a la que se va apurrir un premiu en metálicu de 6.000 euros que tendrá de destinase a la edición d’un CD o un EP y un vídeu. El plazu pa presentar los trabayos remata’l 15 de setiembre.
– Premio Asturies Nuevu de Poesía, Narrativa y Testos Teatrales. N’asturianu o en castellán, les obres ganadores van recibir un premiu de 1.500 euros y van editase dientro de la Colección Texu. Establécense trés modalidaes: poesía, narrativa (narraciones curties o novela curtia) y testos teatrales. El plazu ta abiertu hasta’l 15 de setiembre.
– Programa d’esposiciones de mozos artistes plásticos en Sala Borrón. Podrá presentase cualquier propuesta artística (pintura, escultura, fotografía, instalaciones, videoinstalaciones, etc.) con llibertá para tema, técnica y materiales. Los proyectos escoyíos van formar parte de la programación de Salar Borrón na temporada 2023-2024. El plazu de recepción de trabayos remata’l 13 d’ochobre.
– Premiu Nuevos Realizadores del Principáu, en collaboración col Festival Internacional de Cine de Xixón. Van almitise proyectos para curtiumetraxes de tema llibre, en castellán o asturianu, que nun superen los 25 minutos. Tendrán De incluyir guion, presupuestu, plan de rodaxe, memoria de dirección, plan d’esplotación y formatu d’exhibición prevista, según fontes de financiamientu adicionales, ente otros detalles. Establezse un premiu en metálicu de 8.700 euros y el proyectu premiáu va estrenar nel Festival Internacional de Cine de Xixón/Xixón 2024. El plazu de presentación remata’l 13 d’ochobre.
– Premiu Astragal, dedicáu a proyectos artísticos (instalaciones, videoinstalaciones, acciones, intervenciones y otros procesos creativos) que se realicen espresamente pa la sala d’esposiciones Espaciu Astragal, del Centru de Recursos del Conseyu de Mocedá de Xixón. Cada artista o colectivu va poder presentar un proyectu o obra orixinales ya inéditos. Establezse un premiu en metálicu de 3.800 euros. Les propuestes pueden presentase hasta’l 13 d’ochobre.
El director xeneral de Mocedá, Diversidá Sexual y Derechos LGTBI, Marcos Torre, animó a participar nel programa Culturaquí: “Ye un escelente mediu pa fomentar la participación de la mocedá con moliciones artístiques y sopelexar estes manifestaciones, lo qu’equival a espublizar la so creatividá y la so forma de ver el mundu, sirvir d’altavoz por que comuniquen a la sociedá cuestiones como lo que-yos esmolez, cómo se sienten, qué piensen o cómo ye’l mundu nel que-yos gustaría vivir nel futuru”.
