Na superficie, de Beatriz Redondo Viado, ye un volume que recueye una parte de los artículos d’opinión que foi publicando nel blogue Alien-acción, en concreto, los que van d’últimos del 2011 a avientu del 2024. Dalgunos d’ellos yá apaecieran nel programa de la RPA Naguando, na revista Vértigu o n’Atlántica XXII. Estos testos van de lo particular a lo xeneral, de lo individual a lo social, arreblagando penriba lo xeneracional, que yera un riesgu nel que topetar.
Na superficie nun ye otro que la espresión d’una forma de posicionase ente un mundu que nun s’entiende bien, que ridiculiza’l feminismu o, de frente, atáquenlu escritores «cipotudos y viriles»; asiste l’autora en primer persona al nacimientu del precariáu, quién sabe si una clase social nueva o’l resultáu buscáu del desclasamientu obreru. Escritu nun asturianu bien apegáu a la oralidá, con ritmu periodísticu, áxil, certeru, con bien de retranca y frases feches qu’alquieren significaos nuevos, ye necesario señalar la escritura en femenín, lo que nun-y quita universalidá nenguna a lo escrito. A lo último, si durante sieglos la voz masculina foi considerada la universal non namás na lliteratura, ¿por qué nun había selo la femenina? Por too ello, ye bien interesante da-y al públicu asturiano la oportunidá de lleer esti volume, nel que va atopar placer y reflexón a partes iguales.
Beatriz Redondo Viado
Natural d’El Remediu (Nava), ye profesora de Filosofía na educación secundaria, llicenciada en Ciencies de la Información y en Filosofía y cuenta col master en Xéneru y Diversidá de la Universidá d’Uviéu. Ente les sos publicaciones alcuéntrense’l llibru xuvenil Qué ye que ye’l Tercer Mundu. Un viaxe del centru a les periferies (2004); El País del silenciu (2007), llibru del que ye coautora xunto con Vanessa Gutiérrez y nel que se recueyen hestories de vida de muyeres asturianes na Guerra Civil, y l’ensayu Yá cuasi nunca lo facemos por amor. Conciencies mercenaries (2014), que foi ganador del Premiu d’Ensayu «Fuertes Acevedo» nel 2013. Col cuentu Micaela con H ganó la sétima edición del Premiu de Rellatos Curtios «Xosé Caveda y Nava» (2023), convocáu pol Conceyu de Villaviciosa. Tamién ye traductora al asturianu, xunto con Miguel Moro Vallina, de la novela La peste d’Albert Camus y ganadora del Premiu «Enriqueta González Rubín» de Periodismu nel 2003 col reportaxe El campu asturianu, en víes d’estinción, publicáu nel selmanariu Les Noticies nel 2003, mediu nel que foi redactora dende’l 2002 y directora ente’l 2007 y el 2010. Tien collaborao en medios de comunicación, como El Summun, Atlántica XXII, Muyeres Ateyavana, Diagonal Asturies, Vértigu, Anuariu de la Música Asturiana, Glayíu, Naguando o Nortes.
