El Conceyu de Bimenes ta acabante convocar una nueva edición del XXIV Concursu de Cuentos pola Oficialidá del Asturianu, con trés premios de 600, 450 y 300 euros.
Pa participar, los cuentos han de tar redactaos en llingua asturiana, respetando les normes ortográfiques vixentes. Sedrán inéditos, de tema llibre, non premiaos n’otros concursos lliterarios y que nun tean suxetos a nengún compromisu d’edición.
Los rellatos han de tener una estensión máxima de 10 folios y presentase mecanografiaos a doble espaciu, per una sola cara. Unviaránse l’orixinal en papel y una copia en versión informática (CD). Cada autor o autora nun podrá presentar namás qu’una obra.
Les obres, ensin firma, tienen de presentase con nomatu. Ésti apaecerá nuna plica, en sobre zarráu, onde constarán nome y apellíos del autor o autora, númberu del DNI, teléfonu de contautu, señes y currículu (con semeya).
Los cuentos han d’unviase a: Ayuntamientu de Bimenes (pal XXIV Concursu de Cuentos pola Oficialidá del Asturianu). Plaza de Miranda de l Douro, s/n. CP 33527 – Martimporra (Bimenes). Afítase’l teléfonu de contautu ya información que vien darréu: 985700004.
El plazu de presentación fina’l día 31 d’agostu de 2021 (fecha del matasellos de correos).
El xuráu tará compuestu por trés miembros cualificaos y presidíu pol Alcalde de Bimenes. Los sos determinos nun podrán retrucase. Cualesquiera de los premios podrá quedar ermu, según determín del mesmu.
Les obres premiaes sedrán propiedá d’esti Conceyu y nun se devolverá d’oficiu nengún de los trabayos presentaos. Amás, el ganador del concursu tará a dimposición del Conceyu Bimenes pa formar parte del xuráu nes dos ediciones siguientes, polo que, nesi tiempu, nun podrá participar nel certame.
Nel actu institucional d’entrega de premios, a cellebrar na fecha qu’afite’l Conceyu Bimenes tres l’apertura de pliques, fadráse una llectura pública del cuentu ganador del primer premiu na voz del so autor o autora.
