L’Asociación d’Escritores d’Asturies ta acabante de convocar los Premios de la Crítica y de les Lletres d’Asturies. Podemos alcontrar tres categoríes nos premios de la Crítica:
- Lliteratura infantil y xuvenil en castellán y n’asturianu o eonaviego
- Obra de teatru en castellán y n’asturianu (Obres dedicaes a adultos o a públicu Infantil)
- Ensayu en castellán y n’asturianu o eonaviego
Va concedese un premiu en castellán y un premiu n’asturianu por cada modalidá a una obra d’un autor o autora que naciera o viva n’Asturies. Cualquier persona física o xurídica va poder proponer aquelles obres que considere merecedores d’optar a los premios de la crítica.
Toles obres qu’alleguen al premiu, en caúna de les modalidaes, tienen de ser publicaes ente’l 1 de xineru del añu 2021 y el 31 avientu de 2022 o nel so defectu, antes de la fecha llende d’almisión d’esta convocatoria, pero col númberu del Depósitu Llegal correspondiente a les feches citaes. Nesti últimu casu, toa obra propuesta va quedar escluyida na siguiente convocatoria. En cualquier modalidá van quedar escluyíes aquelles obres que seyan reediciones yá publicaes n’años anteriores, tamién les antoloxíes y obres completes. La fecha llende d’almisión ye hasta’l 30 d’ochobre de 2023 a les 24 hores. Les propuestes van dir acompañaes d’un escritu qu’incluya títulu de la obra, autor, identidá de quien presenta la obra, casa, teléfonu de contactu y llugar de nacencia, amás d’una curtia valoración de la obra presentada. Amás van apurrise cinco exemplares del llibru na mesma dirección.
Les propuestes van unviase a l’Asociación d’Escritores d’Asturies: Hotel de Asociación Santullano. C/ Rosa María Menéndez López, 48, 33011, Uviéu.
Per otra parte, tamién se convoca’l premiu de les Lletres d’Asturies, que va concedese a un autor nacíu, residente o venceyáu a Asturies, que la so obra suponga una aportación especial a la lliteratura asturiana.
Los socios, al corriente de pagu de la cuota correspondiente, van poder presentar candidatures pa optar al Premiu de les Lletres, siempre y cuando se cumplan tolos requisitos d’estes bases. Pa ello, tendrá d’unviase al corréu de l’AEA una propuesta por escritu na que figure’l nome del autor, llugar y fecha de nacencia, dirección postal, teléfonu de contactu, currículum y tolos méritos que se consideren relevantes.
