Ún de los oxetivos principales de l’asociación “Grana, n’Alcordanza de Yolanda Huergo” ye afalar el debate, l’intercambiu d’idees y la creación de conocimientu n’Asturies. Centrándose nesti últimu puntu, Grana convoca la primer edición del Premiu Yolanda Huergo, que quier reconocer trabayos d’investigación de cualesquier estaya de conocimientu y llínia d’estudiu fechos o traducíos al asturianu.
La dotación del premiu ye de 1.500 € arriendes de que l’asociación afalará a la publicación del trabayu premiáu. Los trabayos habrán unviase, enantes del 1 de xunetu de 2023, a la dirección email info@asociaciongrana.com.
Nesta mesma páxina pueden consultase les bases del premiu, pa cualesquier otra dulda podéis ponevos en contacton con nós al traviés del nuestru formulariu de contactu.
D’acordies a estes bases convócase’l I Premiu Yolanda Huergo pa trabayos d’investigación n’asturianu:
- Pueden presentase trabayos d’investigación de cualesquier estaya de conocimientu y llinia d’estudiu.
- Los trabayos han presentase n’asturianu, siendo estos orixinales o traducíos a esti idioma. Habrán de ser inéditos y non premiaos n’otros concursos.
- Los trabayos presentaos habrán de tener una estensión mínima de cien páxines, escrites con interlliniáu 1’5, tipu lletra Arial y tamañu 11. Al tiempu tendrán de tar escritos cola cadarma metodolóxica y conclusiva propia de los trabayos d’investigación, siendo coherentes con aspectos formales normalizaos pa esti tipu de trabayos no tocante al índiz, bibliografía o citación.
- El Xuráu valorará la orixinalidá académica, la calidá metodolóxica de la investigación y la so relevancia científica y social.
- Los trabayos habrán unviase, enantes del 1 de xunetu de 2023, a la dirección email info@asociaciongrana.com nun archivu pdf. N’otru pdf habrá unviase los datos personales (nome, apellíos, dirección, email, númberu de contactu, DNI y una breve biografía del autor/a).
- El premiu ye de 1.500 € suxetos a les retenciones pertinentes y puede ser únicu o compartíu si asina lo decide’l Xuráu, que tamién puede declaralu ermu.
- L’asociación Grana va afalar la publicación del trabayu premiáu. L’aceptación del premiu per parte del autor/a implica la renuncia a los derechos d’edición parcial y total del trabayu premiáu.
- El xuráu tará formáu por:
- Representante, rotatoriu, de l’asociación Grana.
- Secretariu de l’asociación Grana (ensin votu), que llevantará acta de la sesión de deliberación del xuráu.
- Dos persones, escoyíes pola asociación, pola so solvencia investigadora y valir académicu.
- Representante de la editorial.
- L’autor premiáu comprométese a asistir, salvo causa de fuerza mayor, a la ceremonia d’entrega del premiu.
- Toles persones que presenten los trabayos comprométense a l´aceptación d’estes bases.
