Gonzalo Llamedo Pandiella ye anguaño Profesor de Filoloxía Románica na Universidá d’Uviéu, llabor que compaxina col programa de Doctoráu n’Investigaciones Humanístiques. La escritura creativa ye una afición constante na so vida. Nos años 2003 y 2006 ye finalista de los V y VIII Concursos de Rellatu Comarca de la Sidra y, en 2004, tercer finalista d’Asturies nel 44 Concurso Nacional de Redacción de la Fundación Coca-Cola España. Más adultu, en 2016 y en 2017 asoleya dos microrrellatos pal Colectivu “Diversidad Literaria”. No cabero del 2018, estrénase cola escritura en llingua asturiana, resultando en 2019 ganador del II Concursu de Microrrellatos Luisa Rebollar de Sariegu y finalista nel VI Concursu de Microrrellatos La Voz del Barrio de Xixón. En 2020, collabora nel númberu 36 de la Revista Lliteratura y gana’l I Concursu #andanciulliterariu en Twitter d’Iniciativa pol Asturianu y el V Concursu de microrrellatos improvisaos n’asturianu pa la xente mozo Entaína a escribir.
Pocos díes dempués de tener ganao’l concursu Entaína a escribir, Diego Solís fala con él nesta entrevista que vos ufrimos.
¿Cuándo entamesti a escribir?
Creo qu’escribo dende que tengo usu de razón. La primer vez que participé nun concursu de rellatos curtios tenía once años. Préstame dende siempre, la escritura lleva acompañándome en toles fases de la vida, como una llinia de fuga que m’abre un ventanu cuando alcuentro namái paré.
¿Qué te llamó del concursu pa que t’animares a presentate?
Sabía qu’esistía la iniciativa, pero ye’l primer añu que participo. Paezme un exerciciu sanu y honestu, onde pues conocete meyor como escritor, pa bien y pa mal, amás d’una oportunidá estupenda pa interaccionar con otres persones curioses como tu y pa ver per ónde tiramos caún de nós cuando nos aprieten les tuerques.
¿En qué t’inspirasti pa escribir el rellatu?
Na rutina, nel día mecánicu del que munches temporaes avezamos a ser esclavos ensin tiempu pa parar a pensalo. Pémeque tamos llegando al puntu de descuidar hasta la propia alimentación, porque l’estilu de vida que tenemos yá nos obliga a renunciar a lo básico y a nós mesmos.
Sabíemos que yeres bonu na poesía pero paez que tamién nesti formatu, ¿ves rellación ente escribir un poema y un microrellatu?
Bono, lo primero, quiero agradecete’l comentariu, que valoro muncho viniendo d’un compañeru de tinta. Claro que la veo. Ye cierto que son técniques distintes y búsquense efectos diferentes, eso nun lo discuto. Pero, si miramos un pocoñín la historia de la lliteratura románica, que ye na que m’afayo, los temes y los motivos siempre se volcaron d’unos xéneros a otros. Como diría la mio amiga Rosa Medina: unos faen rizoma colos otros.
¿Tienes dalgún proyectu lliterariu ente manes?
Prestaríame abondo. El problema ye’l tiempu: tengo demasiaos partos pa un solu úteru. Nun aparco la escritura, pero nesti momentu soi incapaz de proyectar nada, por motivos d’estudiu y de trabayu. Escribo por placer o como descarga cuando consigo. Tengo tamién coses escrites y dacuando recupéroles y doi-yos “una vueltina”, como diría la nuestra almirada Marta Mori.
Pa rematar recomiéndanos dalguna llectura
Amás del fabulosu, actual ya emocionante poemariu de l’autora qu’acabo de mentar, Orfandá, voi barrer pa casa como romanista y llamar l’atención sobre una obra de narrativa breve medieval, orixinal y de la que pue deprendese muncho: los Lais de Marie de France: una serie de rellatos onde se alvierte l’espíritu cortés de la época y onde s’entemez la realidá cola maraviya.
