“Animatopeyes” ye’l tercer títulu de la colección Pequena de la editorial Trabe, con autoría de Rafa R. Valdés y Samu Castro. Ye un llibrín bien prestosu pa prellectores que xuega coles onomatopeyes que faen (y que se-yos faen a) los animalinos de casa y busca ser un preséu pa families y profesoráu pa tresmitir la llingua asturiana a lo más piquiñino.
Agora (y hasta’l 31 de mayu), la so esposición ta disponible na sala 3 del Centru de Cultura Antiguu Institutu de Xixón de 17:30 a 20:30 hores. La esposición compónse de llámines y de material pa trabayar los distintos sentíos en rellación colos animales (muñecos de trapu, identificación de soníos…).
Xunto a ello, van facese talleres. El 13 y el 20 de mayu ye’l turnu de la globoflexa, mientres que los díes 15 y 22 van ser de papiroflexa. Toos entamen a les 18 hores y toos ellos van acompañase d’un cuentacuentos. Puedes apuntate calcando nesti enllaz.
