La guapa presentadora d’informativos siguía la so charra. La so fala cuasi nun s’entendía y llegaba como un sele marmullu nel que, de xemes en cuando, algamábase dalguna pallabra.
Xune quería enterase de too, pero’l baruyu impidía-ylo. Asina y too pescanció delles coses. Albidró nel noticieru nuevos ataques de perros a paisanos. Nesta selmana repitiérense más d’una docena; yera la tónica xeneral de diba unos díes. Neños y vieyos, muyeres y homes, toos fueren atacaos por perros y toos sufrieren espantibles mancadures. Dalgunu fasta morriera. La solución taba en práutica: pone-yos un chip a tolos perros consideraos peligrosos. Un veterinariu, con bata blanca y barba d’asemeyáu color, ponía pol altu aquella maraviya teunolóxica. Y anque nun lo sintió bien, paecía ser que l’home dicía qu’ellí, naquel chip, contendríense datos perimportantes: dueñu y señes del mesmu (por si se perdía), edá del animal, vacunes, raza, enfermedaes pasaes, etc …
Al cabu, cuasi de siguío y enllazando cola anuncia anterior, apaecía na averdosada pantalla del televisor una política d’altor comentando l’avance teunolóxicu que suponía’l chip na identificación d’animales y, agora que se demostrare la so eficacia, ella mesma diba firmar una propuesta de llei na que s’obligaba a que lu llevaren tolos maltratadores de muyeres y los asesinos más sangrinos. Como preba, escomencipiaríase pola Comunidá de Madrid y, en sabiendo los resultaos, podría espardese al restu’l país o del mundiu, si ficiere falta.
Foi como maxa. Dende aquel día nengún perru más mató a naide o nun hebo anuncia de talos fechos. Eso sí; munchos homes entamaron a matar a les muyeres coles que vivíen y munchos rapazos entamaron a desapaecer secuestraos pol país. Yera cuasi una plaga y la solución llegó darréu: aprobación de la llei pola que tendríen de ponese chips a los violentos y secuestradores de tol país. Nun había tiempu pa más prebes.
Otra vegada xurdió la maxa y dende esi día nenguna muyer más morrió a manes del so maríu y nengún otru neñu foi secuestráu. Vistu’l bon resultáu d’esta midida, decretóse por llei qu’esti chip se fabricare en serie y que tolos hospitales tuvieren bones remeses d’ellos. Tolos recién nacíos taben obligaos a llevar el chip identificativu colos sos datos telemétricos: quién yeren los pás y ónde vivíen (por si se perdíen o los llevaben), edá, vacunes, enfermedaes pasaes, númberu d’identificación personal y mélica, etc …
Dende la plataforma comunicativa, la guapa moza que presentaba les noticies encamentaba a tolos adultos de bona fe, demostrando asina’l so civismu, a que fueren ponelu ellos tamién a cualesquiera de les dependencies hospitalo-policiales d’España. Una panorámica xeneral de les llarguísimes coles frente a les estancies mentaes foron lo siguiente en salir, naquel estrañu telediariu, apostellando l’encamientu.
De sópitu, un movimientu bruscu, un traqueteu y el cambiu de vies sacó a Xune d’aquel espantible suañu de violencia ensin xacíu y controles telemétricos a la población. Una gota de sudu esnidiaba selemente pola so vidaya drecha mientres intentaba calmase.
Xune llevaba munchos años lluchando poles llibertaes del pueblu dende la so pequeña organización y aquel suañu yera la peor velea de la so vida: un mundu esclavizáu enllenu de xente telemétricamente identificao y controlao a cada momentu.
Yá cuasi recuperáu entamó a dase cuenta d’ónde taba y qué pasaba: Quedárase dormíu nel metru de camín a casa. Yeren les tantes de la nueche. Nun yera bon llugar pa quedase dormíu; los carteristes solíen llimpiar a xente confiao como él. Nun actu reflexu echó mano al bolsu l’americana y ellí atopó la cartera; aínda taba ellí. Respiró alliviáu por dos motivos:
El primeru en cuantes vio’l resplandor mariellu d’aquella plaquina metálica asitiada nel borde del so nuevu y relluciente D.N.I. Tamién taben: la tarxeta créditu, la nueva tarxeta mélica, la del so hipermercáu, la de la gasolionera, la de puntos…
En segundu llugar respiró tranquilu yá qu’aquella gafienta velea nun foi más qu’eso: un mal suañu.
