I
Daquella yera’l tiempu del orbayu
y de cuando les pallabres nobles:
Saús, Mosquitera, La Soberana,
daquella prendíemos d’amor nel actu
de cantar bien, neña
xorrascar la voz de fogoneru
que fendía nel aire del silenciu
Cuando la máquina va
Rondando per to ventana quixere
Cantar bien neña, cantar
Cola voz delgada, raspiate
la piel adormecío
Que cimbla’l suelu que cimbla
La voz que canta
II
Quien nun conoz la edá de los caminos
pelos que nun amunchayá que treparon
arrierando la lluz
los carromateros, gufaben
borrina aquelles mules
que col pasu marcaben
el pesu d’un mundu
onde posar los nomes altos
de les altes pallabres,
onde ente’l barru nun había
cansanciu y la respiración yera
fonda y tresparente arriba
mula Gallarda arriba.
