¡Quiero un fíu tuyu , Madre Naturaleza!
de les tos colloraes nubes al atapecer,
de les nocherniegues lluces qu’allumen el to techu,
de los esqueléticos texos qu’antaño t’adoraren.
Quiero un fíu de les tos agües,
del salitre claru del Maresme,
de les tristes foles de Tazones,
de los ríos nos que tantes vegaes me bañé, pero nunca nel mesmu ríu.
Quiero un fíu de los tos montes,
yá sea de Pierzu, d’Urriellu, del Mont Blanc o del Sueve,
de los tos eternos escobios
que como h.achazos d’una diosa caprichosa los colocaren ehí
Pero tengo claro que nun quiero un bastardu
que salga más a min qu’a ti , querida.
Nun quiero’l fueu que te priende,
nin el h.achu que te corte.
Nun quiero un pozu petrolíferu que te desangre,
nin una mina que t’esplote les coraes,
nin un bulldozer qu’estirpe’l to amazónicu pulmón
nin les putes fronteres que te parten.
