Esti sábadu vuelve celebrase un añu más la Feria del Ḷḷibru de Ḷḷuarca. A les 11 hores va procedese a la presentación y va tener llugar el pregón, rimáu por Xosé Manuel Fernández Pérez, pregoneru de la Fiesta de la Regalina. Darréu va tocar nel recintu la Banda Gaitas «El Faro de L.luarca».
Ente les 13 hores y les 13:45 van presentase dellos llibros, ente los que tán “El color de los días” d’esther García y “Dos años después” de Miguel Niño. A les seis de la tarde va celebrase un alcuentru poéticu cola Asociación d’Escritores d’Asturies y l’Asociación de Poetas Valdesanos. L’actu va pesallase a les 19 hores con un conciertu de Manolo Peñayos, miembru de Nuberu.
Na Feria va celebrase mercáu de llibros con editoriales y entidaes como l’Academia de la Llingua Asturiana, BaxAmar, Camelot, Mestura, Fundación Méjica, Iniciativa pol Asturianu, Trabe Pintar-Pintar o El Sastre de los libros, ente otros.
