Quanta Media anuncia’l llanzamientu d’un crowfunding pa espublizar la primer novela de Blanca Fernández Quintana en castellán, Diarios d’Eutopos. La obra, una distopía ambientada nun futuru posapocalípticu, enmárcase dientro del universu EUTOPOS, que llevó a l’autora a algamar el segundu premiu nel Concursu Fernando Belmonte en 2018. La campaña, que ta activa dende’l 1 d’avientu, recueye distintes recompenses pa quien sofite’l micromecenazgu al traviés de la plataforma VERKAMI, ente lo que s’ufre l’apaición del nome del mecenes nel fondu de la portada, la obra (tanto n’epub como en papel) n’asturianu o castellán, marcapáxines personalizaos de madera o llámines esclusives firmaes pola autora. El calendariu que manexa la editorial punxo como fecha d’entrega de les recompenses el mes de mayu,momentu nel que va entamar la xira de presentación de la obra.
SINOPSIS DE LA OBRA
Tres de la Guerrona, ye poco lo que queda de la humanidá. Sobrevivimos a la enfermedá, al cambéu climáticu. Les ciudaes convertiéronse en llugares nos que nun se pue vivir, lletales, onde viven seres a los que-yos queda poco de humanos. Los supervivientes colamos a les zones más arrequexaes nes que volver a entamar. Pero lo peor nun foi eso. Escaecimos cómo lleer. Escaecimos cómo escribir. Los llibros antiguos nun son más qu’ayalgues qu’esponer. Naide pue descifralos. L’únicu restu de conocimientu que nos queda son los Diarios d’Eutopos. Diez diarios que los llocutores deprendieron de memoria. Pero esiste quiciabes un Diariu cero que nos pue devolver al camín del conocimientu Y tenemos que lu encontrar.
SOBRE L’AUTORA
Blanca Inés Fernández Quintana ye una escritora nacida en Bimenes en 1994. Foi la ganadora de la I Premiu Enriqueta González Rubín de Narrativa moza, el I Premiu Radagast de lliteratura de fantasía, ciencia-ficción y terror y el XV Premiu María Josefa Canellada de lliteratura infantil y xuvenil. Tamién tien dellos premios de rellatos y cuentos. Ye collaboradora habitual de la revista lliteraria Formientu, que publica testos n’asturianu de menores de 35 años. En 2023, foi la ganadora del XV Premio Ostana Xoven pola so trayectoria col asturianu, tanto na lliteratura como nos medios audiovisuales, siendo la primer vez que se premiaba esta llingua nel premiu. Nel mesmu añu, recibe tamién n’Italia’l II Premiu Ondras a la llabor pa coles llingües minoritaries.
Ye una de les creadores de conteníu de la plataforma Playpresta (que fai videos en formatu Youtube pal espardimientu del asturianu) dende 2018, presentando l’espaciu Cosplaypresta, onde fala de cosplay, videoxuegos, k-pop y entretenimientu alternativu. Amás, mientres la cuarentena, fixo na plataforma Deprendi Asturianu, onde enseña asturianu pa principiantes. Tamién tien fecho pa ellos directos en Twitch n’asturianu. Ye tamién collabora nel Festival Internacional Celsius 232 de fantasía, ciencia-ficción y terror asesorando na sección de Cosplay y d’El Celsius fala
n’asturianu. Dende 2019 ye profesora de secundaria de Llingua Asturiana y Lliteratura.
¿QUIÉN EDITA LA OBRA?
Quanta Media ye una pequeña editorial de Fantasía y Ciencia Ficción d’Asturies, a pesar de la so mocedá, ya tien editao a autores como Elia Barceló, Rodolfo Martínez, Víctor Conde, Vilar-Bou o Pilar Sánchez Vicente. Como editorial apostamos por ameyorar el nuesu mundu y facémoslo de forma proactiva. Publicamos dos antoloxíes de calter benéficu («Canallas» y «Napoleón y las Puertas del Infierno»). La nuestra política básase nel acompañamientu del autor dende la planificación de la novela, corrección y traducción de testos de forma profesional y tresparencia con nuestros collaboradores.
