Esta selmana arranquen les presentaciones de la obra ganadora del premiu Mª Xosefa Canellada de Lliteratura Infantil y Xuvenil 2020. Trátase de «La Curuxa catuxa» un llibru escritu a comuña ente Inaciu Galán y Vero Suari, anque entá nun ta espublizáu.
El miércoles 27 d’ochobre van tar nel Colexu Públicu Marcelo Gago d’Avilés, faciendo un cuentacuentos empobináu a la reciella de 5 años y de primeru de primaria.
Per otra parte, dambos autores van dar una charra, enmarcada nel ciclu Autores nel Camín, el xueves 28 d’ochobre al rodiu de la obra infantil nel Salón d’Actos de la Escuela de Comerciu de Xixón, a les 19:00h.
El cuentu galardonáu surde d’una idea principal, que ye’l personaxe de Catuxa como una especie de fada de los dientes de la viesca. Catuxa y los sos amigos son amás personaxes con valores como’l compañerismu, l’ecoloxismu, la solidaridá, la igualdá y el sofitu a la diversidá.
