Berto García, autor de Corvera, va presentar nel so conceyu llibru nuevu, el poemariu «Ítaca», editáu por Impronta. El llibru lleva prólogu del escritor y miembru de númberu de l’Acdemia de la Llingua Asturiana Inaciu Galán, que va participar güei nel actu como presentador, y epílogu de la música y escritora Marisa López Diz.
La presentación va celebrase güei, xueves 27 d’abril nel Centru Sociocultural de Les Vegues, de magar les 18 hores. Van participar tamién los talleres de teatru d’adultos de Corvera.
Sobre la obra del aturo comenta l’escritor Ricardo Candás: «La poesía equí sangrada, del escelente poeta Berto García, ye de versu curtiu pero afiláu como la mirada punzante de l’alborada, de poemes breves pero voluminosos como un corazón qu’ama, de llectura reposada pero cargada de la pólvora incendiario del aforismu. Un home abiertu a lo que-y ufre’l llinguaxe (silenciu, entrugues, verdá…) pa falar de la carnosa sede de les vivencies mesmes y la mancadura que fai’l tiempu cuando se tienen les manes vacíes d’amor y los güeyos na memoria. Quien llea esti viaxe hasta Ítaca atropará pallabres presentaes nel orde alfabéticu del misteriu que tien lo que brega contra’l desencantu y qu’afilvana’l tiempu. Porque la voz poliédrica de Berto García caltria pa xorrecer contra’l vacíu, p’amirar lo qu’espera acullá de l’acabación, pa deprender que tres la sudorípara falta d’aliendu siempre hai daqué valoratible que vence al escaezu y qu’acolumbra’l nuestru destín».
La editorial ufre de baldre una amuesa dixital del llibru.
