El poeta xixonés Diego Solís va presentar la so última obra lliteraria, «Volvemos en 6 minutos», n’Avilés, el vienres 28 de marzu. L’actu va entamar a les 19 hores nel Palaciu Valdecarzana, acompañando al autor la escritora Esperanza Medina. La obra edítala Cuatro Gotes Producciones y na realización del actu collabora la Estaya de la Llingua d’Avilés.
Volvemos en 6 minutos ye un llibru de Diego Solís completamente innovador: colos spots que nos arrodien fai una obra poética qu’axunta tradición, cultura pop y una visión única de la realidá dende’l filu conductor d’un zapping televisivu.
El llibru, amás de tar organizáu d’esta manera conceptual, pue lleese o sintise, yá que los poemes van en cada páxina con un códigu QR nel que pue sintise al autor recitando les composiciones. Amás, el proyectu sofítase nes illustraciones de la diseñadora gráfica Inés H., inspiraes nos poemes del autor. Poesía que se llee y se siente, qu’entretién y emociona, que forma parte de la lltieratura pero tamién del mundu qu’habitamos: poesía total.
