La conseyería va abrir nes próximes selmanas cinco comisiones nueves que van confluyir nel Conseyu de la Cultura d’Asturies
La conseyera de Cultura, Política Llingüística y Turismu, Berta Piñán, anunció na xunta constituyente de la Mesa Sectorial de Les Lletres que’l so departamentu va promover un estudiu pa radiografiar el sector, lo que va sirvir de base p’avanzar na busca de les soluciones más afayadices a los sos problemes, polo xeneral, y del mundu de la creación y de la edición lliteraries sobremanera.
La Mesa Sectorial de Les Lletres, cola que la Conseyería de Cultura quier analizar tolos aspectos referentes a la situación actual del sector de la creación lliteraria, la edición de llibros y la difusión de la llectura, decidió, amás, la configuración de trés grupos de trabayu específicos: unu alredor a la creación lliteraria, otru referente a la industria del llibru (edición, distribución, llibreríes, feries, festivales, etc) y un terceru que va abordar tolos aspectos del espardimientu de la llectura (biblioteques, talleres, clubes o circuitos).
Na primer xunta de la mesa, amás de la conseyera, participaron los directores xenerales de Cultura y Patrimoniu, Pablo León, y de Política Llingüística, Antón García; representantes del Institutu de Desenvolvimientu Económicu del Principáu (Idepa), del Real Insituto d’Estudios Asturianos (Ridea), de l’Academia de la Llingua Asturiana (ALLA) y de la Radiotelevisión del Principáu (RTPA).
Otramiente, tuvieron presentes miembros de la Biblioteca d’Asturies, de l’Asociación d’Escritores d’Asturies, de los gremios d’editores, llibreros y de distribuidores, de l’Asociación Profesional de Xestores Culturales d’Asturies, de los clús de llectura y de grupos d’animación a la llectura, xunto. con responsables de cultura de diversos conceyos y escritores asturianos de reconocíu prestíu. Tamién asistieron representantes de delles de les principales feries y festivales que s’entamen n’Asturies como son les de Xixón, Uviéu y Avilés, la Selmana Negra, el Festival Celsius 232 y la Fantabulosa Feria.
La puesta en marcha d’esti organismu enmárcase nel plan de la conseyería pa promover un analís integral y permanente de la cultura asturiana cola creación d’una serie de meses sectoriales que van confluyir, este mesmu añu, na constitución del Conseyu de la Cultura d’Asturies. La de Les Lletres ye la tercera que promueve, depués de les d’Artes Escéniques y la d’Instituciones Culturales.
Cultura previera la constitución d’estos organismos enantes del andanciu de coronavirus, pero la crisis sanitaria obligó a retrasar el proyectu, que se va completar nes próximes selmanes cola creación de les meses sectoriales del Cine y l’Audiovisual, del Videoxuegu ya Innovación, de la Música, de les Artes Plástiques y de la Cultura Tradicional.
