La Tertulia Malory entregó, el sábadu 25 de xineru, el Premiu Malory al meyor llibru n’asturianu del añu 2023 al escritor David Guardado pol ensayu Nunca vencida, una historia de la idea d’Asturies. La entrega del gallardón fíxose nel pub Tom Malory de L’Entregu, sede habitual de la tertulia lliteraria dende hai 27 años.

Na decimotercer edición, el premiu concedióse pela primer vez a un ensayu. El xuráu, que formaron los escritores Xulio Arbesú, José Luis Rendueles, Solinca Turbón, Roberto Corte, Aique Fernandi, Beatriz Quintana Coro, David Fernán, Chechu García, Pablo R. Medina y Henrique G. Facuriella, destacó nel fallu la fondura del trabayu d’investigación de Guardado, amás de la capacidá p’abrir un paradigma nuevu nel análisis de la realidá histórica y cultural d’Asturies. Acordies col acta, Nunca vencida « frañe muchos de los cánones establecíos hasta agora» y constitúi «una llectura necesaria pa entender los raigaños, el presente y el futuru d’esta tierra nomada Asturies».

El gallardón, que busca prestixar la lliteratura n’asturianu, consiste nuna ilustración orixinal del dibuxante Alfonso Zapico y una medaya conmemorativa qu’acreita al ganador como «Legatus Malory». Con esta distinción simbólica, preténdese que la persona premiada se convierta nun llegáu, nun embaxador, de la lliteratura asturiana y de la propia tertulia pel mundo alantre.

Nel discursu d’aceptación, David Guardado agradeció’l reconocimientu y destacó’l valor del premiu pol calter independiente que tien, al ser un grupu d’escritores ensin vinculaciones
institucionales el que lu entrega. «Préstenme especialmente estes coses que son tan de verdá; hasta la pallabra autenticidá está devaluada, polo tanto, que la conservéis ye mui especial», afirmó. Pa Guardado, esti gallardón ocupa un sitiu especial na so trayectoria lliteraria: «Siempre voi decir que’l primer premiu que me dieron foi’l Malory».

Con esti reconocimientu, la Tertulia Malory afita’l compromisu cola promoción de la lliteratura n’asturianu, al destacar cada añu les obres más relevantes nesti idioma. N’ediciones anteriores, recibieron el premiu los autores Xosé Nel Riesgo, Xulio Viejo, Xuan Bello, Antón García, David Artime, Raquel F. Menéndez, Francisco Álvarez, Ángeles Carbajal, Consuelo Vega, Milio Rodríguez Cueto, Ruma Barbero y Xabiero Cayarga.