El director de la revista Formientu, l’escritor Diego Solís, va presentar esti miércoles 22 de mayu «Cállanos con esa música», poemariu billingüe, con más o menos una metá de poemes n’asturianu y otra en castellán. Inaciu Galán va facer la convidada a la llectura del llibru nel actu.
El llibru foi ganador del Premiu Asturies Xoven de poesía en 2018 y va presentase xunto al restu de ganadores de les categoríes de novela y teatru, a les 19.30 hores, na Biblioteca d’Asturies «Ramón Pérez de Ayala», asitiada na Plaza Daoiz y Velarde, n’Uviéu.
Ufrimos dos poemes como adelantu del llibru:
Guerreru
«Voi triar la tierra too
y abrir oculta embaxada per onde vaiga
d’esta patria pequeña
y poderosa».
Pablo X. Suárez
Si la tierra nos fexo febles a la vista de los homes,
vamos deprende-yos nueves perspectives.
Si esti tiempu vien tracamundiáu, colgarémonos del reló,
dirémos-y que nun va poder con nós tan ceo,
si esti exércitu cai, si ye que suelta una llárima,
nun nos xulgar, namás defendemos una patria
pequeña y poderosa, que nun va muncho
deprendió a dicise.
Meat is murder
Somos un ensame de cadarmes,
fabricamos la muerte tres veces al día,
cocémosla bien y echamos-y daqué
pa da-y bon tastu.
Come, rapaz que tas creciendo,
mastica la carne de calabre
que tu yes espertu nesta xera.
