Como parte de la reconocencia que se-y fai esti añu a Lourdes Álvarez, que va recoyer el III Premiu Nacional de Lliteratura Asturiana nel actu del Día de les Lletres Asturianes esti vienres 5, nel Teatru Campoamor, l’ALLA preparó una pieza audiovisual col envís d’homenaxala y esparder el so llabor. 

El documental “Lourdes Álvarez. Premiu Nacional de Lliteratura Asturiana 2023” ye una pieza curtia na qu’otros escritores y espertos conocedores de la obra de la poeta d’Urbiés, percuerren los caminos de la so poesía, analizando la so carrera, les característiques de la so poética y otros elementos como’l so compromisu col asturianu. 

Ente los escritores que participen nel documental tán los dos Premios Nacionales anteriores, Xuan Bello y Xuan Xosé Sánchez Vicente, asina como Marta Mori, Roberto González Quevedo, Esther Prieto y l’espertu en lliteratura asturiana Xosé Ramón Iglesias Cueva. 

Parte de la música del documental ye obra d’Anabel Santiago, artista cola que tien collaborao en delles ocasiones Lourdes Álvarez, poniendo lletra a dalgunos cantares. Na pieza recuéyense tamién semeyes de la vida personal y como escritora de l’autora. 

El documental, que va tar disponible na canal de Youtube de l’ALLA’l mesmu Día de les Lletres Asturianes, va preestrenase esti martes, día 2, a les diez y media de la mañana, con una proyeición nel llar de l’Academia a la que ta previsto qu’asista la so protagonista, Lourdes Álvarez. El documental diríxelu l’académicu Inaciu Galán.