Los oxetivos de la iniciativa son apoyar la creación lliteraria en toles llingües del Estáu y impulsar l’actividá nes llibreríes independientes
El Ministeriu de Cultura y Deporte, al traviés de la Dirección Xeneral del Llibru y Fomentu de la Llectura, convocó una edición nueva del programa d’animación llectora Afinidaes Electives. Alcuentros lliterarios en llibreríes pal 2021, onde pela primer vez inclúyese la posibilidá de que participen autores y traductores qu’escriben y trabayen n’asturianu.
La incorporación d’escritores, traductores y ilustradores en llingua asturiana nesti programa alcordóse nuna xunta que tuvieron el mes d’abril pasáu la conseyera de Cultura, Política Llingüística y Turismu, Berta Piñán, y el director xeneral de Política Llingüística, Antón García, cola directora xeneral del Llibru y Fomentu de la Llectura, María José Gálvez.
Nesta xunta, alcordóse tamién la inclusión del asturianu nos Alcuentros lliterarios n’IES, destinaos a fomentar la llectura ente l’alumnáu de Secundaria. L’alcuentru valió amás pa concretar la presencia d’una manera destacada de la lliteratura asturiana na Feria del Llibru de Frankfurt 2022, na qu’España va ser país convidáu d’honor.
El programa Afinidaes tien como oxetivos, per una parte, impulsar l’actividá en llibreríes independientes y, per otra, sofitar la creación lliteraria en toles llingües propies del Estáu, poniendo en valor la pluralidá llingüística del nuestru país, favoreciendo’l diálogu ente les distintes llingües y contribuyendo al espardimientu de la lliteratura de distintos territorios. Esencialmente, consiste en que llibreríes independientes acueyan los alcuentros lliterarios ente creadores que desenvuelvan la so actividá en llingües distintes (castellanu, catalán, gallegu, euskera, valencianu, aranés, asturianu, aragonés y llionés), animando a caún/a d’ellos a referise al trabayu y a la obra del otru, buscando semeyances, conexones y inclusive caminos diverxentes.
