Los autores mozos Ernesto Is y Raúl Alonso tan acabante de ganar los premios Asturies Xoven de Testos Teatrales y Poesía, respectivamente. Is algamó’l premiu cola so obra Memoria de La Nisal, mientres qu’Alonso fixo lo propio col poemariu Tiempu de nós. Dambos premios formen parte del programa Culturaquí.
El Programa Culturaquí ta concebíu pa ufiertar a la mocedá asturiana la posibilidá de topar un calce nel cual tengan cabida disciplines artístiques heteroxénees y dende el cual la mocedá creadora disponga de la oportunidá d’algamar la reconocencia tanta del públicu polo xeneral como de los distintos medios especializaos. Pueden participar mozos que la so edá nun supere los 35 años a 31 d’avientu de 2023, nacíos o residentes n’Asturies. Tamién los descendientes hasta segundu grau d’emigrantes asturianos.
Ernesto Is (Xixón, 1988) ye tituláu en dramaturxa pola ESAD de Galicia, enantes fórmase como realizador y productor audiovisual. Amplia la so formación con diversos cursos y talleres impartíos por Alfredo Sanzol, Paula Carballeira, Antonio Rojano, Bárbara Colio o Sergio Blanco, ente otros profesionales de la escena. Amás de la so faceta de dramaturgu, trabaya como narrador oral y docente de teatru y escritura dramático. Miembru del conseyu de redacción de la Revista Galega de Teatru, collabora davezu col programa Zigzag Diariu de la Televisión de Galicia y cola revista d’ociu cultural A Movida. Nel añu 2016 gana (ex aequo) el Premiu Abrente de la MIT de Ribadavia cola obra ‘Fendas’. En 2017 llogra’l Premiu Rafael Dieste de Testos Teatrales de la Diputación de Coruña con ‘Despois das ondes’. Vuelve ganar el Premiu Abrente con ‘Profetes’ na edición de 2021. Participó nel VI Programa de Dramaturxes Actuales del INAEM (2017) con ‘L’home que suañaba con elefantes nes estrelles’. En 2018 forma parte del grupu pa la escritura teatral del Centru Dramáticu Galego, coordináu por Manuel Lourenzo, col desenvolvimientu del testu ‘Onde veñen morrer as baleas’. En 2020, los teatros de Bilbao, Donostia y Vitoria escoyeron el so proyectu ‘Cantares mariellos pa flores murnies’ pa participar nel programa Antzerkigintza Berriak. En 2021, escribe la pieza de teatru documental ‘Relatu pa una quema’ gracies a la primer beca de dramaturxa y creación del Agadic.
Raúl Alonso (Xixón, 1999). Hestoriador pola Universidá d’Uviéu y comunicador pola Universidá de Valladolid. Amás, tien nes llibreríes el so primer poemariu, “Los Días vividos” (Ed. Camelot, 2019) y collabora cola revista Formientu. Ente los sos proyectos más notables ta la esposición fotografica: Señardá y memoria encesa. Presentó en 2023 el Semando Fest y dende 2020 codirixe el proyectu audiovisual de cultura asturiana Héroes ensin nome na RPA y nes redes sociales, sobre manera en YouTube.
