La revista de lliteratura asturiana Formientu ta acabante lliberar el so númberu 13 na so páxina web. Dende agora, ye posible acceder a los conteníos d’esti númberu asoleyáu en 2014 al traviés de la Hemeroteca de www.formientu.com, dende onde podemos aportar, tamién otros númberos.
Esi añu foi un bon añu pa la revista. Nesti númberu entamaron a escribir autores como Claudia Elena Menéndez, Andrés Astur Treceño, Diego Solís y Nacho Wings, xóvenes tanto estudiantes como graduaos preparaos pa enanchar el panorama lliterariu asturianu actual. Amás, por fin consiguieron algamar na revista un númberu equitativu ente homes y muyeres escritores, un gran ésitu pa les lletres asturianes teniendo en cuenta que, a día de güei, inda les muyeres son relegaes a un segundu planu nos ámbitos públicos.
Pero esti númeru tamién yera especial por dellos aniversarios lliterarios na nuesa llingua. Per un llau, conmemorábase la espublización del primer llibru n’asturianu conocíu, del escritor Xosé Caveda y Nava, Colección de poesías en dialecto asturiano, facía yá 175 años. Nesti sen, la revista Formientu optó por esparcir una serie de semeyes de los llibros más destacaos de la nuesa lliteratura pente les páxines del númberu, xunto a un reportaxe d’Inaciu Galán falando de delles efemérides del llibru n’asturianu.
Cumpliéronse, igualmente, 40 años dende’l surdimientu de Conceyu Bable, una asociación perimportante pa la recuperación de la llingua asturiana, la so enseñanza y polos trabayos filolóxicos que llevaron a cabo dende la so apaición en 1974.
Nesti númberu cuntamos con un conxuntu d’obres lliteraries ente les que podemos atopar tanto poemes como rellatos.
Poemes:
– Manques, por Diego Solís
– Amenorgando’l tiempu, Voces rotes y París, ho (Lá, Lá), por Andrés Astur Treceño
– Mazana gris, por Naomí Suárez González
– El camín, por Laura García Calvo
– Autorretratu en poema cortu con ecu dadaísta, Cortáu 4’33 y dos Jaikus (El pastor, Primavera), por de Berto Cla
– Enxamás, Tres la lluna, Narniana y Ciudá de suaños, por Nacho Iglesias Wings
– Romance anónimu, ¡Quiero un fíu tuyu!, Coraline Suite (Coraline, Botones rotos, Pieslle de puerta), por Nayar Crespo Sánchez
– Aprovecer, Sobre l’amor de Bécquer, Romance de la güela y Pero fala, por Claudia Elena Menéndez Fernández
– Reflexones al altu la lleva, Na esquina, Cantimplores y botelles y Nel nome del clixé, por Pablo M. Testa
– Métamorphose, por Marina Pangua
– Dempués del Nimbu, por Olinto Dini
– Toi buscando, poema del escritor clásicu Andrés Solar
Narrativa:
– La sanaora, por Alicia Cortina Dávila
– Toi muertu, de Fonsu Suárez Román
– Kebab, de Xurde Álvarez Antón
– Espertar, de Cristina Menéndez Martín
– 8:43, por Inaciu Galán, rellatu ganador del VIII Concursu de microrrellatos “L’horru del Carbayedo”.
