Ediciones Saltadera asoleyera la so obra poética conocida hasta’l momentu na antoloxía «La prueba del once», en 2015. Agora, cuatro años más tarde, Facuriella asoleya «El centinela», que ye «la crónica d’un viaxe vital onde les estaciones márquenles non los sitios, sinon les persones, los alcuentros físicos y les distancies emocionales con esos otros que representen el suañu y la promesa».
El xueves 11 de xunetu, a les 7 la tarde, va presentase’l volume na Llibrería Trabe, na cai Fernando Alonso d’Uviéu.
Henrique G. Facuriella (Blimea, 1980), periodista y escritor, tuvo vinculáu al proxectu editorial del selmanariu Les Noticies (del que foi director) y de la editorial Ámbitu, dirixendo pa esta empresa publicaciones como El Summum o Brixel. Los llibros que tien publicaos son de narrativa (Los fieles de Maalena del 2006 y Intersticios. Estudios pa una topografía de lo que nun ye del 2009) o traducciones (Llunariu d’Al Berto nel 2011; La confesión de Lúcio de Mário de Sá-Carneiro nel 2013 y Llibru del desasosiegu de Fernando Pessoa nel 2014). La so poesía anda esparcida per revistes (Reciella Malory, Formientu, Caravansari…) y antoloxíes, como la publicada nel 2015 La prueba del once (poesía asturiana del sieglu XXI), fecha por Antón García. Tien poemes traducíos d’Al Berto, Pier Paolo Pasolini, Fernando Guimarães y José Terra. Ye miembru fundador de la tertulia lliteraria Malory de L’Entregu, que concede anualmente un premiu lliterariu al meyor llibru espublizáu n’asturianu y ye sociu de l’axencia B.Alto, que publica na so segunda etapa la revista Brixel.
