L’actividá vuelve a la Residencia Lliteraria Xixón nesti 2025 cola llegada de la primer escritora asturiana que va facer una estancia na mesma, la investigadora y ensayista Arantxa Margolles. La so presencia cunta con un patrociniu de la marca asturiana Mamatayoe.
Dientro de la so estancia va celebrase un actu de presentación del so llibru caberu Fuimos granos d’arena. La solidaridá n’Asturies énte’l desastre d’Annual (ed. Trabe, 2024). L’actu va celebrase’l martes 15 de Xineru a les 20 hores na Llibrería de bolsillo de Xixón y va consistir nuna conversación ente l’autora y la escritora Pilar Sánchez Vicente, a les que va presentar Inaciu Galán, director de la Residencia Lliteraria Xixón.
Arantxa Margolles Beran (Xixón, 1982), hestoriadora pola Universidá d’Uviéu y posgraduada pola Universidá Autónoma de Madrid, ta especializada na divulgación de la Hestoria, n’hemerografía y xenealoxía. Collabora en dellos medios de comunicación asturianos y na empresa cultural Cúntame un Cuadro. Responsable de la sección Viejo Gijón nel diariu El Comercio, guionizó y presentó el programa Historias y Misterio en RTPA y foi primer y segundu premiu, respectivamente, nel concursu d’oratoria Xixón Fala en 3 en 2021 y 2022. Da vida a Xosefa de Xovellanos en collaboración cola Oficina de Normalización Llingüística de Xixón y en 2024 foi gallardonada pola ONG Maspaz col premiu Miradass Violetas, na so categoría de Comunicación y Divulgación, pol so compromisu cola perspectiva de xéneru dientro de la Hestoria.
