L’actu d’entrega del Premiu Malory a la novela Memoria de Tuña va facese’l 25 de xunu, a les 17:30 hores, nel pub Tom Malory de L’Entregu
La Tertulia Malory, de L’Entregu, va entregar esti vienres, 25 de xunu, a les 17:30 hores, el premiu al meyor llibru n’asturianu del 2019, nun actu público que se va celebrar nel pub Tom Malory de L’Entregu —onde, dende hai yá 23 años, la tertulia vien aconceyando selmanalmente—. La obra ganadora d’esta novena edición del premiu ye la novela Memoria de Tuña, del escritor de Tinéu, Antón García.
El xuráu d’esta edición formáronlu los escritores Xulio Arbesú, José Luis Rendueles, Solinca Turbón, David Fernán, Roberto Corte, Aique Fernandi, Chechu García y Henrique G. Facuriella, que fallaron el premiu nun actu celebráu na tertulia’l 4 de setiembre del 2020. Esti xuráu destacó, nel acta del fallu, que “la novela guarda una unidá tonal; nella l’autor ye quién a construir, a partir de la señaldá y el sentimientu, un universu simbólicu, onde, con emoción controlada, facer un homenaxe al pueblu, la familia, la infancia y la tradición”. El xuráu reconoció, amás, la calidá de la producción lliteraria n’asturianu del añu 2019, lo que fixo que la decisión de premiar la novela d’Antón García se garrara por mayoría.
El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu’l 25 de xunu. Esta ye la novena vez que’l grupu concede esti premiu. L’añu pasáu resultó ganadora Incorrectos, la novela de David Artime, y n’ediciones anteriores premiáronse les obres El llibru póstumu de Sherezade, de Raquel F.Menéndez, Lluvia d’agostu, de Francisco Álvarez; L’aire ente la rama, d’Ángeles Carbajal; Más espeso que l’agua, de Consuelo Vega; Carne de melandru, de Milio Rodriguez Cueto; La Chelita, de Ruma Barbero, y La ñeve del Cuquiellu, de Xabiero Cayarga. Con esti gallardón, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu.
Memoria de Tuña ye la cuarta novela d’Antón García depués d’El Viaxe (1987), Díes de muncho (1998) y Crónica de la lluz y la solombra (2015). Col paisaxe común de Tuña, l’autor llevanta una novela fragmentaria qu’argaya l’alma dende una prosa llimpia y contenida, l’esiliu de los familiares más allegaos del xeneral Riego en Llondres, les carbonerines de rapiña, Hemingway pescando salmones, les sentíes pallabres del últimu presidente de la República o la figura de Pelayo danse la mano nun universu creáu en Tuña, un universu onde reposen toles esperances y emociones del ser humanu y onde se mecen los caminos, ún a ún, del mundu enteru. Ye la memoria d’un pueblu y, al empar, la memoria mesma de la vida.
Antón García (Tuña, 1960), escritor y editor, ye ún de les principales figures de la lliterartura asturiana del Surdimientu. Llicenciáu en filoloxía española pela Universidá d’Uviéu, como editor funda los sellos Tsibros de Frou (1983-1988), Trabe (1992) y Saltadera (2007).
Tien cuatro noveles publicaes: El Viaxe (1987), Díes de muncho (1998), Crónica de la lluz y la solombra (2015), y Memoria de Tuña (2019); como poeta tien escrito: Estoiru (1984), Los díes repetíos (1989), Tierra adientro (2007), La mirada aliella / La mirada atenta (2011) —una antoloxía billingüe onde reúne los llibros anteriores con dalgún poema inéditu—, y Ferralla (2016). La so poesía ta parcialmente traducida al castellanu, francés, catalán, vascu, alemán, portugués, gallegu, occitanu y rusu. Ye autor, amás, de delles obres d’investigación lliteraria y ensayos, y director de numberoses revistes, ente elles Adrei, Zimbru o Campo de los Patos.
