Lletres Asturianes asoleya, dende 1982, trabayos científicos orixinales centraos na llingua y la lliteratura asturianes, entendíes nun sen ampliu y na so rellación col ámbitu hispánicu y románicu. Espublízase semestralmente (marzu y ochobre) y puede lleese en REUNIDO, la plataforma de revistes científiques de la Universidá d’Uviéu, y na páxina web de l’Academia de la Llingua Asturiana (ALLA).
Agora, espubliza’l númberu 127, qu’agospia artículos qu’estudien aspeutos llingüísticos, lexicográficos, lliterarios, traductolóxicos, socioculturales y musicales. Estes contribuciones, de gran valir, faen por enanchar el corpus de la publicación y de los estudios sobre la llingua y la lliteratura asturianes.
Ente los bayurosos estudios podemos alcontrar el de Manuel Duarte Joao Pires, onde fai un análisis del portugués faláu na aldea fronteriza d’Avelanoso, el de Isabel Díaz Trancho, que se val del estudiu específicu d’artistes como Rodrigo Cuevas, Ún de Grao y el Coru Al Altu la Lleva p’amosar les tendencies nueves de la música asturiana de recién na so rellación col tiempu y l’espaciu, o el de Victor Suarez Piñeiro, qu’estudia la representación que fai Armando Palacio Valdés del asturianu —al traviés del léxicu y la fraseoloxía— na novela en castellanu Sinfonía Pastoral (1931)
Amás d’esto, les páxines del númberu 127 agospien delles reseñes bibliográfiques, delles noticies y anuncies al rodiu de la llingua asturiana y les novedaes editoriales d’esti añu.
