El miércoles qu’entra, 10 d’abril, arranca la cuarta temporada del programa de la canal PlayPresta, La cla invisible, nel que los escritores Laura Marcos y Diego Solís dan a conocer novedaes na edición de llibros n’asturianu y falen de lliteratura.
Como vien siendo vezu dende l’entamu del programa, que llega yá a la so cuarta temporada, el formatu grábase nel espaciu de La Llocura Llibrería-Café en Mieres del Camín.
L’avance de la temporada cuarta que ta yá na canal PlayPresta da anuncia de que Solís y Marcos vienen «con ganes de metese en fariña y falar de les últimes polémiques lliteraries». Y ye que’l primer capítulu d’esta cuarta temporada va xirar al rodiu de la polémica que xeneraron nos círculos lliterarios asturianos les dures crítiques apaecíes nel últimu númberu de la revista Brixel. Otru capítulu va dedicase a la situación de la traducción al asturianu y a los alderiques abiertos sobre la conveniencia o non de tornar obres del castellán al asturianu, ente otres cuestiones.
Amás, ente los llibros de los que va falase nesta temporada tán les novedaes d’autores como Xaime Martínez, Ismael González Arias, Pablo Antón Marín Estrada, la versión de La Rexenta n’asturianu de Víctor Suárez, o per primer vegada, un llibru en gallego-asturianu.
El programa va estrenar un capítulu nuevu cada miércoles a les 21:30 nes canales de PlayPresta en Facebook y YouTube, asina como na so páxina web PlayPresta.
