Cuatro Gotes Ediciones estrena con esti llibru de Xuan F. Bas la Colección «Alfredo Villa y Villa» d’investigación y ensayu
Cuatro Gotes Ediciones ta acabante poner nes llibreríes «L’escudu d’armes de Xixón. La iconografía de Pelayu», de Xuan F. Bas. Con esti llibru la editorial xixonesa estrena la colección «Alfredo Villa y Villa» d’investigación y ensayu n’asturianu.
Dende la ordenación del territoriu asturianu en conceyos nos sieglos XIII y XIV per aciu de la concesión de cartes puebles, fueron surdiendo una serie núcleos de población qu’actuaben como centru de les actividaes alministratives, xurídiques y económiques de la contorna y teníen un sellu propiu p’autentificar los documentos de so. Esos sellos más alantre daríen llugar al “escudu d’armes” que cada conceyu comparte entá anguaño colos sos territorios. Nel casu de Xixón, ye inconfundible la figura del rei Pelayu nesi escudu.
En L’escudu d’armes de Xixón, Xuan F. Bas Costales (llicenciáu en Xeografía y Historia pola Universidá d’Uviéu) invítanos a danos una vuelta pelos cambios polos que pasó esi sellu distintivu de la ciudá, dende entamos del sieglu XVII, cuando s’acordó facer un sellu d’armes cola persona del infante Pelayu. Una imaxe que foi camudando y usando modelos estremaos hasta qu’en 1949 el Conceyu dexó afitao l’escudu oficial de Xixón cola figura del rei Pelayu afatáu como un guerreru godu, con cota de mayes, túnica, capa, corona y cruz de la victoria con blagu na manzorga y espada apuntando al suelu na mandrecha. Una evolución que’l autor analiza minuciosamente, acompañao por ilustraciones bien interesantes onde vamos ser a ver los cambios polos que pasó D. Pelayo en sellos, edificos y otres instituciones oficiales onde s’usó esi escudu d’armes.
Según nos cuenta el propiu Xuan F. Bas Costales, l’orixe d’esta investigación editada por Cuatro Gotes Ediciones “alcuéntrase nun capítulu d’un llibru sobre la historia de Xixón qu’espublizó’l Conceyu en 2006, tituláu Una historia de papel. 500 años en los documentos del AMG, como catálogu de la esposición del mesmu nome. Yá daquella pensé que yera un testu bien guapu p’asoleyar de forma independiente; de mou que, años depués, con dalgo de tiempu, pudi dedicame a enanchar el testu orixinal a la par que-y daba un enfoque distintu y lu tornaba al asturianu.
Xuan F. Bas Costales ye profesor d’educación secundaria y bachilleratu de Xeografía y Hestoria y de Llingua asturiana y Lliteratura, amás de corrector ortotipográficu y traducor. Publicó trabayos d’investigación como editor Dos estudios etnográficos sobre el oriente de Asturias (2007) y La Pesca del Eo. Cultura y tradición ribereña (2007).
El llibru puede atopase yá en delles llibreríes de Xixón (Cuatro Gotes Producciones Paradiso, La Buena Letra, La Revoltosa, Atenea y Central) y nes llibreríes Trabe y Cervantes d’Uviéu.
