Ediciones Trabe ta acabante asoleyar «La colomina 36», novela de Nicolás Bardio ganadora del Premiu Asturies Xoven de Narrativa en 2019.
Fabián salió gayasperu de l’Academia del KGB. Lo que nun sabía yera que’l so primer destín diba ser facese pasar por un vecín más nuna colomina deprimente nel Mieres soviéticu de 1970. ¿Quién vive na colomina 36? ¿Quién son los vecinos de Fabián? Y lo más importante de too, ¿son lleales a la Unión Soviética? ¿Terroristes? ¿Espíes? Vamos descubrilo en La colomina 36, la que ye una novela d’espíes y fustración llaboral que vien a enantar l’universu del xuegu de rol Depués d’Ochobre.
Nicolás Bardio (Uviéu, 1987) ye llicenciáu en Ciencies Polítiques pola Universidá Complutense de Madrid y máster n’Información y Comunicación con especialidá en Periodismu pola Universidá Llibre de Bruseles. Traductor y narrador, tien publicaes les noveles Sol reló (2008), claru exemplu de novela negra na que s’amesta la crítica social y política, y Cuando ensamen les abeyes (2011), obra ucrónica d’aventures. Nel 2019 foi a sacar el primer xuegu de rol n’asturianu, Depués d’Ochobre.
Anguaño ta trabayando na traducción de La sociedá del aniellu, de J. R. R. Tolkien, primer volume de la triloxía d’El señor de los aniellos.
