Del Llau del Nigromante nun ñaz namás cola voluntá de ser la primer novela de fantasía épica n’asturianu; sinón, tamién, d’adautar (una parte de) la bayurosa mitoloxía del nuesu país a los cánones de la lliteratura fantástica universal. Celurna ye’l país que domesticó a los Homones y los fai trabayar nos diques del puertu; el país que tien tovía peligrosos Pataricos n’estáu salvaxe y, tamién, aquél nel que ñaz de xemes en cuando un magu nuberu qu’ha de formase lleendo y prauticando. ¿Consiguirá’l Nigromante llevantar una Güestia cola qu’acabar col mundu de los vivos?
Hasta qué puntu pue llegar un Nigromante na so busca de la vida eterna? ¿Cuántos seres vivos ye a matar una persona pa devolve-y la vida a un muertu? ¿Ye posible facer obedecer a les bisarmes?
Égor Balzarec, magu nuberu, va descubrir les respuestes a toes estes entrugues nun viaxe que lu va llevar de los montes más altos a les poces más fondes. Acompáñalu na nueva saga de fantasía escura n’asturianu y una de les poques qu’emplega la nuesa mitoloxía a la hora de construyir un mundu de lleenda.
Nicolás Bardio (Uviéu, 1987) ye llicenciáu en Ciencies Polítiques pola Universidá Complutense de Madrid y máster n’Información y Comunicación con especialidá en Periodismu pola Universidá Llibre de Bruseles. Traductor y narrador, tien espublizaes les noveles Sol reló (2008), Cuando ensamen les abeyes (2011), La colomina 36 (2020) y Del llau del Nigromante (2020), amás de la traducción del primer volume d’El Señor de los aniellos.
