Una ciencia sin enfotu, de Ramón d’Andrés, ye la obra ganadora del Premiu «Máximo Fuertes Acevedo» d’Ensayu 2021. Agora, dientro de les presentaciones convocaes por mor del mentáu premiu, l’autor, acompañáu del profesor de la Universidá d’Uviéu Alfredo Álvarez, va presentar la obra el xueves 15 d’avientu, a les 19:00 h, nel salón d’actos de la Biblioteca d’Asturies «Ramón Pérez de Ayala» (Biblioteca d’El Fontán), asitiada na plaza Daoiz y Velarde, 11, d’Uviéu.
Una ciencia sin enfotu ye, en palabres del propiu autor, «una reivindicación de la llingüística científica y del so papel na cultura de la sociedá»; ye, al dicir del xuráu que-y concedió’l premiu, «un manual básicu p’abrir los güeyos de cualquiera, filólogu o non, sobre la ciencia y la non-ciencia que consumimos, asimilamos y creyemos al falar de llingües nel día a día». Partiendo del fechu de que tovía güei, en plenu sieglu xxi, hai que parase a esplicar que nun hai llingües meyores qu’otres, que toes elles valen pa comunicar cualesquier conteníu o que nun existen llingües imperfectes, l’autor desenrolla toa una argumentación sobre lo qu’él llama «la deserción social» de la llingüística, que la fai ser una ciencia sin enfotu: los llingüistes nun fueron a poner enfotu bastante nin nos propios descubrimientos y conclusiones nin n’esparder y dar a conocer a la sociedá los conocimientos y descubrimientos de la so ciencia. Esa falta d’enfotu (en sen internu y esternu), esa deserción social de los llingüistes, ye lo que fai posible qu’alredor del llinguaxe humanu y de les llingües sigan creyéndose coses qu’habríen tar superaes depués d’un sieglu de llingüística científica.
Ramón d’Andrés (Madrid, 1959) ye filólogu especializáu n’asturianu y profesor titular de Filoloxía Española y Asturiana na Universidá d’Uviéu. Miembru de númberu de l’Academia de la Llingua Asturiana, foi corredactor de les Normes ortográfiques y del Diccionariu de la llingua asturiana, obres d’esta institución. Miembru del RIDEA, ye tamién traductor del catalán y d’otres llingües, amás de collaborar en dellos periódicos y de desenrollar artículos divulgativos tocante al asturianu y los prexuicios que contra esta llingua perviven na sociedá asturiana.
