Ediciones Saltadera ta acabante sacar al mercáu la obra ganadora del XI Premiu María Josefa Canellada de lliteratura xuvenil, «Invisible», d’Aique Fernandi, con ilustraciones de Juan Hernaz.
Na obra, un rapaz, Enol, que ve lo invisible y tarrez el mieu nos güeyos de los otros. Un home, Xosepe, qu’anda la llinia ente la vida y la muerte, invisible pa tola xente o cásique. Los dos afuxen d’un mundu gris y ensin xacíu que los demás llamen realidá. Nel encruz d’estes dos vides nacen esperances y reviven enfotos olvidaos, pero tamién resuciten monstruos del pasáu.
Aique Fernandi (Sotrondio, 1967) ye llicenciáu en Filoloxía Inglesa. Depués de vivir en Sama, L’Entregu, Galicia, Estaos Xuníos, Dinamarca, Xapón o Méxicu, vuelve a Llangréu, onde fai de profesor, normalizador, traductor, escritor y quintu malorín. Tornó dos obres de teatru del inglés al asturianu: Lo que vio’l mayordomu de Joe Orton, y La importancia de ser Severu d’Oscar Wilde, amás d’esparder delles poesíes per revistes del país y ganar dalgún premiu colos sos cuentos.
