«De les lletres a les imáxenes. Los cartelos de les Xuntes d’Escolines y Escolinos d’Avilés» ye’l títulu d’esta amuesa que xunta 10 obres del ilustrador avilesín. Completen la esposición otros trabayos de Solís pa la Casa la Cultura y el Teatru Palacio Valdés.
La entrada del auditoriu de la Casa la Cultura acueye, hasta’l 8 de mayu, la esposición «De les lletres a les imáxenes. Los cartelos de les Xuntes d’Escolines y Escolinos d’Avilés» formada por obres del dibuxante avilesín Miguel Solís Santos. Podrá visitase nos horarios que tien el centru cultural pa les esposiciones: de llunes a sábadu, dende les 11:00 hasta les 13:00 hores y de 18:00 hasta les 21:00 hores, y los domingos, de 11:00 a 13:00 hores.
L’amuesa ta formada polos diez carteleos que sirvieron p’anunciar cada Xunta ente los años 2004 y 2013. Nellos, Miguel Solís asoleya la temática escoyida en caún d’esos años con motivu de la Selmana de les Lletres Asturianes, con presencia de disciplines como la música, el teatru o’l cómic, ensin escaecer los y les escritores de mñas renome na lliteratura en llingua asturiana al lo llargo los sieglos.
Amás, la esposición complétase con otros trabayos que’l dibuxante fizo por encargu del Conceyu d’Avilés rellacionaos cola Casa la Cultura y el Teatru Palacio Valdés, nesti casu con motivu del décimu aniversariu de la reinauguración.
Les Xuntes d’Escolines y Escolinos d’Avilés es una actividad que fai’l Conceyu d’Avilés per aciu de la Estaya de la Llingua dende hai dieciséis años. Ta pensada como un foru d’alcuentru del alumnáu de dellos niveles de Primaria, Secundaria y Bachilleratu, qu’estudia l’asignatura de llingua asturiana.
Nesti foru intercámbiense esperiencies, trabayos sobre la llingua y la lliteratura asturianes, enséñense proyeutos. Pal alumnáu ye tamién un puntu d’alcuentru onde conocese, rellacionase y pasar un día nun ambiente prestosu, onde pasalo bien, solidariu y amistosu.
L’autor
Llicenciáu en Bioloxía y profesor de Bioloxía y profesor de Bioloxía y Xeoloxía nel IES Carreño Miranda, ye miembru de l’Academia de la Llingua Asturiana dende la so creación. Dibuxante y escritor, ye autor de la considerada como primer novela contemporánea n’asturianu: Les Llamuergues Doraes (1982).
Ye tamién autor de la novela pa la mocedá El Misteriu de la Cámara de Cuarzu, y dibuxante y guionista de varies histories ilustraes, ente les que destaquen La Hestoria d’Avilés y el trípticu que fizo pal V Centenariu del nacimientu de Pedro Menéndez (2019). Ente les sos obres pal públicu infantil ta la coleición de Ñuberu, y títulos como como Nosotros los Pexes, Les Xanes, El Cuélebre y La Guaxa, esti últimu cola torna al Gallego-Asturianu entitulada A Bruxa. Solís tamién participó como ilustrador en llibros d’otros autores.
Como cartelista, xunto cola coleición pa les Xuntes d’Escolines y Escolinos d’Avilés y la riestra cartelos del auditoriu de la Casa la Cultura y del Teatru Palacio Valdés, ye autor de cartelos pa campañes diferentes y actividaes, como Navigatio de Samalandrán o Sestaferia del Intercélticu d’Avilés. Creó tamién el cartel pa la Selmana de les Lletres Asturianes en 2017.
Ente les sos reconocencies tán el que foi ganador delles veces del Premiu Xosefa Xovellanos de Novela, asina como’l d’Enriqueta Rubín de Periodismu n’asturianu en 2007. Algamó l’accésit na edición de 2000 del Premiu Fuertes Acevedo con La Memoria de les dos Orielles (aprosimación al estudiu de les xeneraciones astur-cubanes). Ye tamién collaborador en dellos medios de comunicación asturianos.
