L’Asociación de Traductores Profesionales n’Asturianu, Verbéu, participó esti viernes 17 y sábadu 18 de payares nel aconceyamientu añal de la Red Vértice, en Zaragoza, pa formalizar la so inclusión nel conxuntu.
La reunión tuvo organizada pola asociación Asati (Asociación Aragonesa de Traductores e Intérpretes) y dedicó la xornada del vienres a falar de les condiciones llaborales d’interpretación en llingua de señes y de conferencies, mentes que’l sábadu trató aspectos técnicos del conxuntu d’asociaciones, ente otros, la firma del conveniu d’integración de Verbéu na rede.
Red Vértice nació nel añu 2009 como una manera de xuntar a toles asociaciones de traductores, intérpretes y correctores con presencia nel estáu español, pa defender los derechos y intereses d’esti coleutivu, informar de convocatories y formación, enfrentar males práctiques y divulgar la situación en dellos ámbitos de trabayu. Anguaño ta conformada por 20 entidades.
L’asociación Verbéu fundóse nel añu 2021 col envís de dignificar y profesionalizar l’exerciciu de la traducción y la interpretación n’asturianu. Na so curtia esistencia collaboró col Gobiernu d’Asturies en delles ocasiones pa organizar los congresos de traducción; amás, celebra regularmente traduxuntances y edita la so propia revista, Brandal.
