Güei martes 13 d’avientu, a les 19:00 hores, Xandru Martino va presentar la que ye la so segunda novela, Vincitur inimicus, editada por Delallama Editorial. L’actu va ser na llibrería La Buena Letra de Xixón.
Vincitur inimicus cunta la hestoria d’Alfonso II, a mediu camín ente la realidá y la ficción, al traviés de los güeyos de Pelayu, un monxu amanuense que conoz al rei nel so retiru n’Ablaña y recibe l’encargu d’escribir la so crónica. Una mirada enllena matices al rodiu del monarca, esmolecíu por afitar el poder d’Asturies énte l’amenaza sarracena o l’influxu de Carlomagnu.
Vincitur inimicus ye la segunda novela de Xandru Martino Ruz pa públicu adultu y la segunda qu’espubliza con Delallama Editorial. Nel 2020 asoleyó, tamién n’asturianu, la novela histórica Nunn, que narra la invasión romana d’Asturies y que foi un ésitu rotundu que sigue algamando llectores.
