El xuráu destaca’l tratamientu del tema del confinamientu de 2020 “dende una perspectiva orixinal y con alta calidá lliteraria”
La obra Boliescritu de primavera, de Xilberto Llano Caelles, foi galardonada col premiu María Josefa Canellada de lliteratura infantil y xuvenil n’asturianu na so decimocuarta edición.
El xuráu quixo destacar del trabayu de Llano Caelles “el tratamientu del tema del confinamientu de 2020 dende una perspectiva orixinal y ensin cayer en tópicos”, amás de la so “alta calidá lliteraria y el bon usu de la llingua asturiana”. L’acta del xuráu resalta tamién “el nivel xeneral de calidá calidable de les obres presentaes y la diversidá de perspectives qu’aborden”.
Nesta edición, y baxo la presidencia del director xeneral de Política Llingüística, Antón García, el xuráu tuvo integráu pol alcalde de Cabranes, Gerardo Fabián, Alonso Zamora Canellada, familiar de María Josefa Canellada, les escritores Alba Carballo ya Iris Díaz, Penélope Miranda, responsable del serviciu de Normalización Llingüística del conceyu de L.lena, ya Inaciu Galán, profesor y escritor, coautor de la obra ganadora de la pasada edición, La curuxa Catuxa. Actuó como secretaria Laura Marcos, filóloga de la Dirección Xeneral de Política Llingüística.
Xilberto Llano Caelles (Arroes, Villaviciosa, 1965) ye llicenciáu en Filoloxía Hispánica pola Universidá d’Uviéu y profesional de biblioteconomía. En 1987 llogró’l Premiu Xosefa Xovellanos cola novela De Corinto, de Grecia. En 1988 publica la so segunda novela, Sencia. En 1995 llogra’l Premiu Xuan María Acebal de poesía col llibru Silabariu (1996). Ye tamién autor de les traducciones al asturianu de les obres: Alicia nel país de les maravíes (1989) y L’otru llau del espeyu y lo qu’Alicia atopó ellí (1992) de Lewis Carroll, xunto con El relatu d’Arthur Gordon Pym, d’Edgar Allan Poe.
