Francisco Álvarez González (Xixón, 1970) foi’l ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so edición númberu ventidós. El primer premiu, dotáu con 600 euros, foi pa la so obra Rosa d’iviernu.
El segundu premiu, dotáu con 450 euros, foi pal cuentu La nieve nun ye blanco y el cuervu nun ye prietu (dalgunes coses, por embargu, sí lo son), de Xaime Martínez Menéndez (Uviéu, 1993), y Xuan Trenor Allen (Uviéu, 1981) algamó’l tercer premiu, al que se-y apurren 300 euros, con Cavilaciones d’un home enroldáu.
Nesta edición, a la que se presentaren dieciocho cuentos, el xuráu tuvo compuestu polos escritores Xulio Vixil Castañón, Héctor Pérez Iglesias y Pablo Rodríguez Medina, amás de pol Alcalde Bimenes, Aitor García Corte, y el técnicu responsable de la Estaya de Cultura, Daniel Cueli Canto, que fixeren les funciones de Presidente y Secretariu respectivamente. L’actu d’entrega premios tovía nun tien fecha pero’l Conceyu Bimenes dará anuncia d’ella d’equí a poco.
