El testu de la ganadora en narrativa, María Abril, tien dellos rellatos escritos n’asturianu
L’actu tuvo presidíu pol vicerrector d’Estensión Universitaria y Proyección Internacional, Francisco José Borge, y cuntó cola intervención del críticu lliterariu Ángel Alonso
El vicerrector d’Estensión Universitaria y Proyección Internacional, Francisco José Borge, presidió l’actu de presentación de les obres ganadores del Concursu Lliterariu de la Universidá d’Uviéu 2019, celebráu na Aula Rector Alas del Edificiu Hestóricu. El Vicerrector tuvo acompañáu de María Fernández Abril, ganadora na modalidá de prosa con «Una línea en la parde»; Lydia Castellanos, que s’impunxo na modalidá de poesía con «Luz»; y Ángel Alonso, críticu lliterariu y miembru del xuráu del concursu. Nel actu tamién tuvo presente la directora d’Área d’Estensión Universitaria, María Álvarez, amás de profesoráu del Departamentu de Filoloxía Española de la institución académica: Inmaculada Urzainqui, Javier García Rodríguez y Eduardo San José.
Francisco Borge felicitó a Fernández Abril y a Castellanos pol gallardón consiguíu -dotáu con 1.000 euros per cada modalidá y la espublización de la obra-, y señaló qu’esti premiu ye unu de los que se concede con más prestu, al tar destináu a les y los estudiantes universitarios. El Vicerrector amosó’l so deséu de qu’esta distinción-yos sirva como llombarada pa siguir escribiendo. Coles mesmes, anunció que la próxima convocatoria del concursu va espublizase de manera inminente.
Pela so parte, Ángel Alonso, profesor de Llingua y Lliteratura y críticu de revistes como «Clarín» y «Anáfora», punxo en valor la calidá de los dos llibros presentaos, espublizaos pol Serviciu de Publicaciones de la Universidá d’Uviéu, y sorrayó qu’esti ye un premiu «más que prestixáu, que ganaron José Luis Sevillanu, Xaime Martínez, Raquel F. Menéndez, Candela de les Heras o Daniel Rodríguez Rodero, ente otros, y por eso felicítovos por llogralu».
María Fernández Abril (Mieres, 1992) ye graduada en Llingua Española y les sos Lliteratures pola Universidá d’Uviéu, onde tamién cursó’l Máster en Formación del Profesoráu y el Máster en Llingua Española y Llingüística, y onde anguaño esfruta d’un contratu Severo Ochoa pa realizar la so tesis «América en Feijoo y Feijoo en América». Tien obra asoleyao na revista Formientu y participó nel confinamientu nel #FormientuEnCasaFest. Ente los y les autores que tuvo como referentes al encetar la obra premiada atópense Julio Cortázar, Cristina Fernández Cubas, Marta Sanz y Vanessa Gutiérrez. «Una línea en la pared» inclúi testos n’asturianu y en castellán, microrrellatos y rellatos de cierta estensión, articulaos toos ellos alredor de cuatro característiques, según señala’l xuráu: «contención espresiva; trames imaxinatives; variedá de temes, con predilección pola lliteratura ya inclusive’l cine; y amiestu d’autobiografía y ficción». Pa Fernández Abril, «tolos rellatos parten d’una mínima anécdota, non necesariamente personal, suxeta depués a un tratamientu ficcional y lliterariu».
Tocantes a Lydia Castellanos (Avilés, 1997), la vida académica llevóla per carreros distintos a la lliteratura -ye estudiante de Trabayu Social-, pero lleva «conectada coles lletres desque tengo memoria, escribiendo pa espresase d’otra forma y lleendo lo que fora pasando peles sos manos», afirma. Ente les sos referentes cita a Elvira Sastre, Irene X o Natalia Menéndez. Pal xuráu, «Luz» ye «un llibru honestu qu’amuesa la sensibilidá de la perda amorosa dende una fresca perspectiva femenina, combinando sentimientu y elexía. L’autora sírvese de referencies hestóriques y culturales (Pearl Harbor, John Donne) como reflexu de la so biografía, xunto con referencies más personales (l’Alzheimer d’una güela, l’alcordanza de Peñerúes)». La escritora indica qu’esti poemariu «ye un procesu de cayíes, golpes y erros, de sigue alantre sabiendo que lo importante ye llevantase».
