La 40.ª edición de la Selmana de les Lletres Asturianes destaca esti añu’l papel que la música cantada n’asturianu y en gallego-asturianu desempeña na normalización de dambes llingües. Hasta’l 9 de mayu siguen les actividaes de tou tipu repartíes per diez conceyos: talleres, esposiciones, homenaxes, presentaciones de llibros, llectures públiques, certámenes lliterarios, alcuentros escolares, entregues de premios, conciertos, representaciones teatrales…
Esti vienres 3 va regalase un discu conmemorativu 40 años al son de la nuestra música/40 anos al son da nosa música, con motivu del Día del Llibru Asturianu, en 56 puntos de distribución d’Asturies al mercar llibros y discos n’asturianu o en gallego-asturianu. Trátase d’una selección de 40 cantares que percuerren la historia de la música cantada nestes llingües.
El sábadu 4 de mayu va inaugurarase la VII Feria del Llibru y Discu n’asturianu, entamada col Conceyu d’Uviéu y l’Asociación de Llibreríes del Principáu d’Asturies. La Feria, instalada na Plaza Trescorrales, va tar abierta tamién el domingu, y va cuntar con presentaciones de llibros, sesiones de cuentacuentos, conciertos y alcuentros lliterarios.
La postrera de les actividaes específicamente dedicada a la música ye’l conciertu d’ópera n’asturianu que’l claustru del Muséu Arqueolóxicu d’Asturies va acoyer el domingu 5 de mayu a les 12:30 hores. El tenor Pedro José González, el barítonu Juan Salvador Trupia, el pianista Mario Bernardo Fernández y el Coru de la Universidá d’Uviéu van interpretar una selección de pieces adaptaes al asturianu pol músicu y escritor Carlos Rubiera.
Nel programa de la Selmana hai tamién actividaes teatrales para los más pequeños, como la que va acoyer el Teatru de La Llaboral Ciudá de la Cultura de Xixón, que va acoyer la representación de les obres De qué color ye’l sol, de Kamante Teatru (miércoles 8), y Nunca nun se sabe, d’Higiénico Papel (xueves 9).
El vienres, 3 de mayu, el colexu públicu Llorienzu Novo Mier d’Uviéu va ser l’escenariu del actu escolar institucional de celebración de la Selmana de Les Lletres cola entrega de los premios de los certámenes artísticos y lliterarios.
El gallego-asturianu va tar presente nel Auditoriu de Tapia, el sábadu 4 de mayu, a les 19.00 hores, col Homenaxe ás nosas lletras, que nesta ocasión protagoniza’l grupu de rock Bacotexo, cola presentación en conciertu del so últimu discu, Mar.
Otra actividá na Sala Borrón d’Uviéu: la cuarta edición d’Entaína a escribir, concursu de microrrellatos improvisaos n’asturianu pa mocedá que se convoca en collaboración col Institutu Asturianu de la Muyer y Polítiques de Mocedá.
