¿Tienes más de 16 años, tas empadronáu o empadronada en Llanera y préstate pola vida la cultura xaponesa? Ye más, ¿gústente los haikus, eses pequeñes composiciones poétices tan guapes? Entós tas de suerte. La Conceyalía de Dinamización Social y Comunitaria del Conceyu de Llanera convoca, con motivu del confinamientu al que yá tamos avezaos, el Concursu de Haikus #Llaneraencasa. D’esta manera, podrás pasar un buen ratu y escaecer por un momentu estos tiempos difíciles que nos toquen vivir.
Los haikus tendrán una temática concreta: deberán tar ambientaos na esperiencia de la vida en cuarentena, y cada concursante podrá unviar trés haikus tanto en castellanu como n’asturianu, lo que fai d’esti concursu más interesante. El plazu termina’l 10 de mayo a última hora de día, polo que entovía hai tiempu abondu pa dar rienda suelta a la imaxinación.
Los premios tienen valor de 50 € en material de llibrerías y comercios del conceyu de Llanera, ún pal haiku ganador en castellanu y otro pal haiku ganador n’asturianu. Toles obres que cumplan les bases serán publicaes nes redes sociales del Ayuntamientu de Llanera una vez finalizáu el plazu de presentación.
¡Nun duldes más y participa!
Taller de Laura Marcos sobre haikus
