¿Nunca pensaras qu’un poema pue realizase… mediante imáxenes? La poesía ye una sucesión d’imáxenes feches con pallabres. Un haiku ye un poema que se compón de trés imáxenes. Pero, ¿y si te proponemos crear un haiku al traviés d’un videu? A esto ye a lo que mos anima’l II Certame de haikus visuales de la LlABoral Centru d’Arte.
Pa esti concursu, onde se combinen tanto l’arte lliterariu como l’arte audiovisual, los concursantes habrán crear un videu de non más de 30 segundos onde tien d’apaecer, tamién, el haiku escritu, yá seya en llingua asturiana o castellana, o recitáu. El haiku habrá correspondese cola métrica tradicional de trés versos ensin rima, de 5, 7 y 5 sílabes, y tendrá que tratar el tema del confinamientu pol coronavirus.
Nun hai llímite d’edá pa esti concursu, polo que nun hai escusa pa nun participar. Amás, el ganador podrá llevar un premiu de 250 €, un llote de publicaciones de LlABoral Centru d’Arte y Creación Industrial y un carné d’Amigu de númberu de La LlABoral pal añu 2021.
El plazu d’entrega de los orixinales ta abiertu dende’l día 23 d’abril hasta’l 15 de mayu. Por embargu, fuera del plazu podrán unviase haikus que s’espublizarán nes redes sociales.
Si te presta xugar colos distintos tipos d’arte y, amás, tamién te presten esti tipu de composiciones tradicionales, ¡esta ye la to oportunidá!.
