Si yes estudiante de sestu de Primaria o de la ESO y tienes un especial sentimientu pola llingua asturiana, esti concursu pue interesate. La Conceyalía d’Educación y Cultura del Conceyu de Xixón, col enfotu de recordar la figura del xesuíta Don Federico González-Fierro Botas, un home preucupáu pola normalización llingüística de la nuesa llingua, quien treslladó numberoses obres ruses al asturianu, convoca la tercer edición del Premiu Fierro Botas a la meyor idea normalizadora del conceyu de Xixón.
L’oxetivu d’esti eventu sedrá l’indicáu pol títulu del premiu: normalizar la nuesa llingua con idees orixinales de la mocedá de Xixón, quien tienen na so mano’l futuru del asturianu.
Pa participar nel concursu, l’alumnáu habrá presentar un diseñu de campaña normalizadora que desarrolle una iniciativa orixinal pa favorecer l’usu y la visibilidá del asturianu en Xixón, con un proyectu de máximu 5 fueyes nel formatu estándar. Podrán aportase los documentos que se consideren neesarios pa la mayor comprensión del trabayu, como semeyes, planos, etc.
El plazu de presentación ta abiertu dende’l 30 de payares de 2019, y finalizará el 30 d’abril de 2020. El premiu consistirá nuna pizarra dixital pal aula de llingua asturiana del centru que resulte ganador, amás de la posibilidá de la realización del proyectu suxeríu.
¡Nun dexes pasar esta oportunidá!
