La Residencia Lliteraria Xixón, en collaboración cola Conceyalía de Cultura y Educación de Xixón, da anuncia de la convocatoria de la I Beca Rosario Acuña, empobinada a muyeres escritores en cualesquier xéneru lliterariu y llingua del mundu que precisen d’un espaciu y tiempu pa la realización d’un proyectu lliterariu.
La beca ufierta una estancia creativa d’un mes na ciudá de Xixón, n’Asturies, del 24 de payares, al 24 d’avientu del 2025. Inclúi agospiamientu na Residencia Lliteraria Xixón y dotación pa gastos de tresporte, asina como la organización de dellos actos mientres la estancia de la escritora na Residencia.
La convocatoria va tar abierta hasta’l 17 de payares del 2025 a les 23:00 hores. Van poder participar muyeres mayores de 18 años que cunten con a lo menos dos llibros espublizaos.
El proyectu lliterariu presentáu tien de ser orixinal ya inéditu y va ser evaluáu por un comité d’espertes de reconocíu prestixu nel ámbitu lliterariu. Les propuestes han tener un máximu de 4 fueyes y tienen d’incorporar una biografía lliteraria de l’autora, too ello nun mesmu archivu en formatu pdf, word o asemeyáu.
Les solicitúes han mandase al traviés del corréu electrónicu: info@lliterariaxixon.com
La Residencia Lliteraria Xixón
La Residencia Lliteraria Xixón ye un espaciu urbanu pensáu pa la estancia d’escritores en periodos de tiempu nos que van dedicase a la creación lliteraria o la traducción de distintos xéneros. L’oxetivu ye atrayer talentos culturales a la ciudá de Xixón, aportando un llugar nel que trabayar cola proyección que supón la rede d’establecimientos y eventos públicos y privaos qu’alredor de la lliteratura se celebren nel conceyu.
L’escritor y xestor cultural Inaciu Galán vivió nesti espaciu a lo llargo de cuasi una década y en 2023 punxo a disposición l’apartamentu pa la creación lliteraria dende Xixón, buscando tender pontes con otres lliteratures, otres llingües, otres cultures. Les instalaciones de la residencia, asitiaes nel barriu xixonés de L’Arena, consten d’un pisu completamente equipáu que yá tien acoyío a escritores como Romina Berenice Canet, Marisa Martínez Pérsico, Alba Quintas, Ramón Caride, Arantxa Margolles Berán, Garbiñe Salaberría o David Uclés, ente munches otres.
La Beca Rosario Acuña
La beca de creación va desenvolvese mientres un mes nel espaciu de la RLX y ta destinada a la creación lliteraria per parte de muyeres escritores, seya cualesquiera’l xéneru lliterariu nel que trabayen. El nome d’esta beca vien dau n’homenaxe a Rosario de Acuña y Villanueva, activista y pensadora feminista clave de finales del sieglu XIX y entamos del XX.
Rosario de Acuña y Villanueva (1850-1923) foi escritora, pensadora y periodista. De familia cercana a l’aristocracia, tuvo una educación lliberal y la posibilidá de viaxar al estranxeru yá de moza. Estes esperiencies permitieron qu’entamara bien ceo a amosar interés en delles cuestiones sociales dende un puntu de vista illustráu. Republicana, anticlerical y siempres polémica na so producción lliteraria y periodística, lluchó tola vida contra les desigualdaes, pagando especial atención a la equidá ente homes y muyeres, ensin escaecer otros colectivos desfavorecíos.
Más información y contactu cola residencia, equí.
