La Sociedá Humanitarios de Samartín de Morea (Ayer) ta acabante de convocar el XVII Concursu de Monólogos, que tendrá que s’axustar a les bases que vienen darréu:
1. Puen participar toles persones interesaes, col númberu de trabayos que-yos pete.
2. Premiaráse con 300 € aquel monólogu, ensin asoleyar qu’a xuiciu del xuráu presente más valir lliterariu. El premiu podrá repartise o quedar ermu. L’actu d’entrega del Premiu va formar parte de los actos inxeríos dientro les VI Xornaes Culturales dedicaes a l’alcordanza de Joaquín Rodríguez Muñiz, que se cellebrarán nel mes de xunu.
3. El monólogu tendrá que tratar d’un tema d’actualidá social, política y cultural.
4. La obra podrá ser en versu o prosa; tendrá que tar en Llingua Asturiana y valoraráse la correición llingüística y gramatical, asina como’l so caráuter normalizador del idioma.
5. El llargor de los trabayos tendrá de ser d’un máximo de cinco folios, en prosa, o ente 150 y 250 versos.
6. El plazu d’entrega de los monólogos fina’l 17 d’abril de 2022 y tienen que se mandar a estes señes: HUMANITARIOS DE SAMARTÍN, apartáu correos 8, 33670 – Morea (Ayer-Asturies). Cada trabayu tien que dir nun sobre zarráu, ensin remite, col orixinal y tres copies, y amás, dientro’l sobre habrá otru sobre onde se conseñen los datos del/a concursante.
7. El resultáu de la decisión del xuráu va notificáse-yos al autor -o autores- del trabayu premiáu.
8. La obra premiada tendrá que se lleer o interpretar nel actu d’entrega del premiu.
9. Les obres premiaes son propiedá d’Humanitarios. Los monólogos non premiaos nun se van devolver. Sicasí, l’autor pue facer l’usu que considere más amañosu.
10. El xuráu escoyeráse ente persones cualificaes. Un miembru de Los Humanitarios fadrá de secretariu, con voz y votu. Les decisiones del xuráu nun se puen retrucar.
11. El participar nesti concursu lleva inxerío aceptar dafechamente les bases d’esta convocatoria.
12. El ganador tien que venir de xuráu al año siguiente.
