Hai un cantar, del grupu K-Nalón, tituláu “Hip Hop” que diz: “Di cuatro pasos, púnxime a baillar, quería deprender el picurrabucu mortal”. Demientres facía la llectura, vínoseme al caletre esti son a cuenta de la pallabra cucurrabucu, qu’apaez delles veces na narración. El picurrabucu de K-Nalón aseméyase enforma al cucurrabucu emplegáu por Xaime Martínez, y nun lo digo pol significáu del términu que, poques gracies, ye’l mesmu. Dígolo porque, tal qu’un equilibrista na pista central del escenariu novelescu, l’autor atrévese con una actuación anovadora, amosando pasos pequeños d’esperiencia vital pa poder disfrutar la danza la escritura, adebeciendo por descubrir esa vuelta peligrosa anunciada por K-Nalón según executa la so función. “La fuercia o les cuatro epifaníes de Martín Feito” ye un cucurrabucu lliterariu al ritmu, por qué non, del Hip Hop.
Un escritor mozu, Martín Feito, aporta al pueblu de Chaneces, aconseyáu por un compañeru de trabayu, col envís d’atopar un llugar afayadízu pa desendolcar el llabor lliterariu que-y apruz en cuenta d’una beca. Pela cueta, nun ye esi tresfondu’l que-y tien preparáu’l llugar y pali que pali los pocos vecinos del pueblu entamen a facer rellación con Martín, mientres qu’esti tampoco nun s’esmolez por dedica-y tiempu a la xera lliteraria. El visitante conviértese en compliz y collaborador de secretos y bilordios que lu van enguedeyar amodo per Chaneces y la redolada. La so misión d’escribir tracamúndiase coles aventures reales nun mundu kafkianu qu’arreciende a estereotipos globalizadores del sieglu XXI. A un debalar pelos raigaños rurales d’una sociedá cuantayá abandonada a la so suerte. Porque les modernidaes etnográfiques faen mecigaya colos mitos y los vezos de la historia más recién, señaldosa y combativa d’Asturies.
La novela ta estructurada en trés partes: Muries, Ventanes y Espeyos. Les dos primeres tan narraes en tercer persona, mientres que la última ye’l propiu protagonista’l que nos cuenta’l rellatu. Camiento que, nes dos primeres, se debe a que Martín Feito nun tien claro (o quiciabes ye por dexase llevar) qué ye lo que quier y lo que busca. Descubre les coses al azar o por engataes que-y preparen, golifa pelos requexos del pueblu ensin oxetivu nengún, disfruta’l viaxe anque nun pescancie del too lo que pasa. Na parte final, Espeyos, el llibru garra velocidá supersónica tal que si tuviera Martín participando nuna “yincana” persecutoria na que sí ye quien a tomar decisiones. Racionales o irracionales ye lo de menos, el casu ye actuar por ún mesmu (por eso, pienso, la narración en primer persona). Nun pretenda’l llector ablucar cola fin de la historia, albidro que tampoco nun ye lo que Xaime Martínez naguaba. El mensaxe que nos queda ye la necesidá d’esperimentar vivencies a lo xole, tal como lleguen, pa la profesión d’escritor. Nun s’escaecer de les prioridaes vitales per enriba de les lliteraries. Según-y van asocediendo aventures, Martín Feito toma nota de los acontecimientos como trabayu de campu y como enseñanza filosófica que yá nun s’apregona. Nun ye’l plan que tenía, pero pagó la pena. El rescoldu l’idealismu surde en Martín Feito escontra l’esbarrumbe social que contempla.
Nun puedo tampoco dexar de dicir como “La fuercia o les cuatro epifaníes de Martín Feito” recordóme a la prosa de Dolfo Camilo Díaz. Esa imaxinación argumental de Xaime Martínez fízome pensar nello. Surrealismu, suaños, Kafka. Llugares que nos son cercanos pero yá tan camudaos. Personaxes qu’en pueblu pueden paecer de la ciencia ficción pero que se dan muncho más de lo que la nuestra devoción cultural nos dexa ver. Golores sensoriales, lesbianas, traficantes, música d’esti sieglu, rapazos, paisaxe natural apocalípticu o lliteratura profunda componen l’universu de Chaneces, onde la comida basoria faise güecu y el chigre’l pueblu tien sielles de multinacionales en cuenta d’escaños tremaos pola sabiduría antigua. Onde les barbacoes y los “dj’s” aforfuguen a les romeríes y la puya’l ramu. Una sociedá qu’acolumbra la postindustrialización pero tien en frente una cadarma siderúrxica. Un pueblu que s’abelluga nos mitos y les lleendes, les que s’idolatren como relixones o les que permanecen nel mantra de la llucha guerrillera. Zunes, repunancies, cosmopaletismu, comedia.
Hai delles referencies musicales. A mi, como señalaba al principiu, la novela suéname a hip hop, a xeneraciones nueves que tovía pueden conocer el pasu’l tiempu pero contáu d’otra manera, con otru estilu. Tamién hai llugar pa referencies lliteraries (equí paezme que de sonadía pal propiu autor) y cinematográfiques, onde m’imaxiné a Martín Feito formando parte de la mafia siciliana o entrando nel chigre’l pueblu cola traza del “far west”. Yá lo diz na primer páxina’l llibru: “una novela de vaqueiros”. Pero tamién de los de sobremesa nel televisor con pistoles en cuenta de guiyaes. Xaime Martínez aterriza nel mundu narrativu con esta historia diferente, como distinta va ser la so aportación a la lliteratura n’asturianu (ye la so primer novela). Pel camín de lo cenciello, de lo previsible, non. Va ser asonsañando’l pasu del picurrabucu mortal de K-Nalón.
