L’Asociación Mercado Artesano y Ecológico, con motivu de la celebración del Día de les Escritores el 18 d’ochobre, organiza’l 1er Certame de Microrrellatos en Llingua Asturiana sobre Muyeres. Téntase poner en valor la presencia de les muyeres na lliteratura, como creadores y como protagonistes de les histories.
Estes son les bases de la convocatoria:
- Temática: Nesta edición queremos que los microrrellatos y los dibuxos traten, dende un puntu vista positivu, sobre la presencia de les muyeres na lliteratura como creadores y como protagonistes de les histories. Poro, los trabayos habrán tener como protagonistes a muyeres escritores de cualesquier época de la historia o a personaxes femeninos ficticios
- Participantes: Va poder participar de forma individual l’alumnáu del cursu 2021-2022 del segundu ciclu d’Educación Infantil y de los distintos niveles d’Educación Primaria de los centros educativos del Principáu d’Asturies. L’alumnáu de segundu ciclu d’Educación Infantil va facelo con un dibuxu, y el d’Educación Primaria con un microrrellatu.
- Categoríes: Establécense les siguientes categoríes de participación:
Categoría 1: segundu ciclu d’Educación Infantil.
Categoría 2: 1u y 2u d’Educación Primaria.
Categoría 3: 3u y 4u d’Educación Primaria.
Categoría 4: 5u y 6u d’Educación Primaria.
- Presentación de los trabayos: Cada centru educativu va poder presentar un máximu de cinco trabayos por cada aula perteneciente a caúna de les categoríes del puntu 3. Cada estudiante va poder presentar una única obra, qu’habrá ser orixinal y nun se pudo haber presentao a nengún otru concursu o certame.
Los dibuxos habrán ser en formatu «DIN-A4». La téunica y materiales son llibres, pero nun tendrán calter tridimensional. Nun puede figurar el nome nin la firma de l’autora o autor. Na parte trasera hai qu’escribirel títulu del trabayu y el nome del centru.
Los microrrellatos habrán tar escritos a mano, n’asturianu, con lletra llexible y nun foliu «DIN-A4». Nun puede figurar el nome nin la firma del autor o autora. La estensión máxima de los trabayos será de 20 llinies. Na parte superior de la páxina, va escribise’l títulu del microrrellatu, la categoría y el nome del centru.
Cada centro educativo va presentar:
– Un sobre zarráu por cada categoría a la qu’opten, que va contener otros dos sobres: * un sobre zarráu colos trabayos.
* otru sobre zarráu cola rellación de los títulos de los trabayos que se presenten y los/es sos autores correspondientes, el nome del centru educativu, l’aula y la categoría na que participen.
L’incumplimientu de les condiciones espuestes va suponer la esclusión del certame.
El plazu de presentación de los trabayos va ser dende’l día siguiente a la publicación de les bases hasta les 14.00 hores del vienres 19 de payares de 2021. Los sobres van unviase a estes señes:
Asociación Mercado Artesanu y Ecológico (1er Certame de Microrrellatos en Llingua Asturiana sobre Muyeres) Hotel d’Asociaciones de Xixón, Avda Manuel Llaneza, 68-Baxu. 33208 Xixón (Asturies).
Premios. Van premiase tres trabayos por caúna de les categoríes del certame. Los premios van consistir en lotes de productos del Mercáu Artesanu y Ecolóxicu, llibros y entraes a eventos culturales.
- Xuráu: El xuráu va tar formáu por persones con esperiencia rellacionaes cola materia oxetu del certame. El fallu del xuráu va ser inapelable. La resolución de los premios va comunicase a los centros educativos ganadores.
- Entrega de premios: La entrega de los premios va facese durante la edición del Mercáu Ecolóxicu y Artesanu en Xixón el 4 al 8 d’avientu de 2021.
- Cesión de derechos: El Mercáu Artesanu y Ecolóxicu, como organizador del certame, va reservase’l derechu de reproducir, imprimir, publicar o esponer los trabayos ganadores citando’l nome del autor o autora.
- Vuelta de los trabayos: Los trabayos non premiaos van devolvese a los centros educativos n’acabando’l certame.
